पुरुषतर्फ ललितपुरका अशोक श्रेष्ठ र महिलातर्फ बेथानचोककी रिक्जना भोटेलाई प्रतियोगिताको सर्वोत्कृष्ट खेलाडी घोषित गरिएको छ। बागमती प्रदेशस्तरीय मेयर कप भलिबल प्रतियोगितामा पुरुषतर्फ ललितपुर महानगरपालिका र महिलातर्फ बेथानचोक गाउँपालिका च्याम्पियन भएका छन्। विजेता टोलीले दुई लाख र उपविजेताले एक लाख रुपैयाँ नगद पुरस्कार प्राप्त गरेका छन्। २७ असार, काठमाडौं।
महिला तथा पुरुष भलिबल प्रतियोगितामा पुरुषतर्फ ललितपुर महानगरपालिकाले महांकाल गाउँपालिकालाई ३–० को सेट अन्तरले पराजित गर्दै च्याम्पियन बन्यो। ललितपुरले महांकललाई २५–२०, २५–१५, २५–२० को सेटमा हराएको हो। महिलातर्फ बेथानचोक गाउँपालिकाले काठमाडौं महानगरपालिकालाई ३–१ को सेटमा पराजित गर्दै उपाधि जित्यो। बेथानचोकले पहिलो सेट २५–१६ को स्पष्ट अंकले जितेपनि दोस्रो सेट २१–२५ ले गुमायो। त्यसपछि तेस्रो सेट २५–२३ र चौथो सेट २५–८ को अंकले जित्दै च्याम्पियन बन्न सफल भयो।
प्रतियोगितामा उत्कृष्ट खेलाडीको रुपमा पुरुषतर्फ ललितपुरका अशोक श्रेष्ठ र महिलातर्फ बेथानचोककी रिक्जना भोटे चयन भएका छन्। दुवैले १०-१० हजार रुपैयाँ नगद पुरस्कार प्राप्त गरे। अन्य उत्कृष्ट खेलाडीहरुमा महिलातर्फ सुनिता बस्नेत, पूर्णकला केसी, सारिका कार्की र स्मृति राइ रहेका छन्। पुरुषतर्फ महांकलका बलदेवसिंह धामी, सुवास कुँवर, चिरन खड्का, अनिल सिंह र राजन दर्लामी मगर उत्कृष्ट खेलाडी घोषित भएका छन्।
प्रतियोगिताका विजेता तथा उपविजेता टोलीका खेलाडीलाई ललितपुर महानगरपालिकाका प्रमुख चिरीबाबु महर्जन, उपप्रमुख मन्जली शाक्य बज्राचार्य लगायत विशिष्ट अतिथिहरुले ट्रफी, मेडल, प्रमाणपत्र तथा नगद पुरस्कार प्रदान गरेका थिए। बागमती प्रदेशका महिला र पुरुष गरी १६ टोलीले सहभागिता जनाएको प्रतियोगिता असार २३ गतेदेखि सञ्चालन गरिएको थियो।
सम्बन्धित खबर
