२० वर्षभन्दा लामो विश्व फुटबल करियरमा लियोनल मेसीले अहिलेसम्म इंग्ल्यान्डविरुद्ध खेल्ने मौका पाएका थिएनन्। अब त्यो प्रतीक्षा समाप्त हुन लागेको छ। फिफा विश्वकप २०२६ को सेमिफाइनलमा पूर्व विजेता अर्जेन्टिना र इंग्ल्यान्ड आमनेसामने हुनेछन्। आफ्नो अन्तर्राष्ट्रिय करियरमा पहिलोपटक इंग्ल्यान्डसँग भिड्ने ३९ वर्षीय लियोनल मेसीका लागि यो खेल अत्यन्तै महत्वपूर्ण छ। अर्जेन्टिना र इंग्ल्यान्डबीचको फुटबल इतिहास निकै अर्थपूर्ण रहेको छ। २८ असार, काठमाडौं।
फुटबलको संसारमा लियोनल मेसीले गर्ने बाँकी योगदान अब शायद सीमित हुँदै गइरहेको छ। आठ पटकको बल्लोन डी’ओर विजेता, विश्वकप विजेता कप्तान, अर्जेन्टिनाका लागि सबैभन्दा बढी खेल खेलेका र गोल गर्ने खेलाडी, र विश्वकप इतिहासकै सर्वाधिक गोलकर्ता मेसीको परिचय यिनै उपलब्धिहरूले हुन्छ। तर, २० वर्ष लामो अन्तर्राष्ट्रिय यात्रामा मेसीले इंग्ल्यान्डसँग खेलेको थिएन। अब त्यो प्रतीक्षा समाप्त हुन लागेको छ। फिफा विश्वकप २०२६ को सेमिफाइनलमा पूर्व विजेता अर्जेन्टिना र इंग्ल्यान्ड आमनेसामने हुन्छन्। एटलान्टामा हुने यो खेलले फाइनलमा पुग्ने टोली मात्र निर्धारण गर्ने छैन, विश्व फुटबलको एक प्रसिद्ध प्रतिद्वन्द्वितामा नयाँ अध्याय थप गर्नेछ। र त्यो नयाँ अध्यायको केन्द्रिय पात्र हुनेछन् ३९ वर्षीय मेसी।
अर्जेन्टिनाका लागि २०० भन्दा बढी खेल खेल्दै १२५ गोल गरिसकेका मेसीले ब्राजिल, उरुग्वे, फ्रान्स, जर्मनी, नेदरल्यान्ड्स, स्पेन र इटालीजस्ता ठूला प्रतिद्वन्द्वीहरू विरुद्ध खेलेका छन्। तर उनले कहिल्यै इंग्ल्यान्डसँग खेल्न पाएका छैनन्। रोचक कुरा के हो भने मेसीको सम्भावित अन्तिम विश्वकपमै उनको पहिलो इंग्ल्यान्डविरुद्धको खेल हुन गइरहेको छ, त्यो पनि सेमिफाइनलमा। मेसीलाई कसरी रोक्ने? यस विश्वकपमा आठ गोल गरेका मेसी फ्रान्सका किलियन एमबाप्पेसँगै गोल्डेन बुटका शीर्ष दावेदार हुन्। क्वाटरफाइनलमा स्विट्जरल्यान्डविरुद्ध उनलाई गोल गर्न पहिलो पटक असफलता भोग्नुपर्यो, तर अर्जेन्टिनाले अतिरिक्त समयमा ३-१ को जित निकाल्दै सेमिफाइनलमा स्थान बनाउन सफल भयो।
