इटालीले पहिलो पटक टी-२० विश्वकपमा स्थान बनाउँदै आईसीसीबाट सन् २०२५ को ‘एसोसिएट पुरुष टोली उत्कृष्ट प्रदर्शन’ अवार्ड प्राप्त गरेको छ। विश्वकप छनोटका निर्णायक खेलमा स्कटल्यान्डलाई पराजित गर्दै इटालीले ऐतिहासिक उपलब्धि हासिल गरेको आईसीसीले जनाएको छ। आईसीसी अध्यक्ष जय शाहले विजेता टोली र संस्थाहरू विश्व क्रिकेट समुदायका लागि प्रेरणाको स्रोत भएको उल्लेख गर्नुभयो। २८ असार, काठमाडौं।
पहिलो पटक टी-२० विश्वकपमा स्थान बनाएको इटालीले अन्तर्राष्ट्रिय क्रिकेट परिषद् (आईसीसी) बाट सन् २०२५ को उत्कृष्ट एसोसिएट पुरुष टोली प्रदर्शन अवार्ड प्राप्त गरेको छ। आईसीसीले आफ्नो वार्षिक सम्मेलनमा घोषणा गरेको ‘आईसीसी डेभलपमेन्ट अवार्ड्स २०२५’ अन्तर्गत इटालीलाई ‘एसोसिएट सदस्य पुरुष टोलीको वर्ष उत्कृष्ट प्रदर्शन’ अवार्ड प्रदान गरिएको हो। इटालीले ऐतिहासिक रूपमा आईसीसी पुरुष टी-२० विश्वकप २०२६ मा स्थान बनाएको उपलब्धिका कारण यो अवार्ड पाएको आईसीसीले जनाएको छ।
नेदरल्यान्ड्सको रोटरड्याममा भएको युरोप छनोटमा स्कटल्यान्ड र नेदरल्यान्ड्सलाई विश्वकप पुग्ने मुख्य दाबेदार मानिएको थियो। तर इटालीले निर्णायक खेलमा स्कटल्यान्डलाई हराउँदै सबै अनुमान उल्ट्याएर पहिलो पटक टी-२० विश्वकपमा स्थान बनाएको थियो। विश्वकपमा पनि इटालीले प्रभावशाली प्रदर्शन देखाएको थियो। समूह चरणमा नेपाललाई पराजित गर्दै इटालीले सनसनी मच्चाएको थियो। पहिलोपटक विश्वकप खेलिरहेको इटालीको प्रदर्शनले विश्व क्रिकेट समुदायको ध्यान तानेको थियो।
आईसीसीले एसोसिएट क्रिकेटमा इटालीको ऐतिहासिक विश्वकप छनोटलाई सन् २०२५ को उत्कृष्ट पुरुष टोली प्रदर्शनका रूपमा सम्मान गरेको छ। आईसीसी अध्यक्ष जय शाहले एसोसिएट सदस्यहरूले विश्वभर क्रिकेटको विकास, सहभागिता र प्रदर्शनमा महत्वपूर्ण योगदान दिइरहेको बताएका छन्। उनले विजेता टोली र संस्थाहरू विश्व क्रिकेट समुदायका लागि प्रेरणाको स्रोत भएको पनि उल्लेख गरे। आईसीसी डेभलपमेन्ट अवार्ड्समा सात विधामा विजेता घोषणा गरिएको छ।
