थाइल्यान्डको राजधानी बैंककस्थित एक बारमा भएको भीषण आगलागीमा कम्तीमा २७ जनाको मृत्यु भएको छ। घटनामा ६० भन्दा बढी व्यक्ति घाइते भएका छन् भने केही व्यक्ति अझै बेपत्ता रहेका छन्, स्थानीय सञ्चारमाध्यमले जनाएको छ। थाई प्रधानमन्त्री अनुटिन चार्नभिराकुलले आगो विद्युत् प्रणालीको स्विचबाट सुरु भएको र अत्यधिक ज्वलनशील सामग्रीका कारण तीव्र रूपमा फैलिएको अनुमान गरेका छन्।
सोमबार मध्यरातपछि आगलागी भएको खबर अस्पतालका दमकल टोलीलाई प्राप्त भएसंगै तत्काल घटनास्थलमा पुगेको थियो। त्यतिबेला बारको मुख्य प्रवेशद्वारबाट मानिसहरू आगो र धुवाँबाट जोगिन भागिरहेका थिए। सामाजिक सञ्जालमा सार्वजनिक भिडियोमा बारबाट ठूलो आगोको मुस्लो निस्किरहेको, मानिसहरू चिच्याउँदै भागिरहेका, केही लडिरहेका र कम्तीमा दुई जनाको शरीरमा आगो सल्किएको देखिन्छ।
प्रधानमन्त्रीले घटनास्थलमा सञ्चारकर्मीहरूसँग कुरा गर्दै आगलागीको कारणबारे अनुसन्धान भइरहेको जानकारी दिए। दमकलकर्मीहरूले करिब आधा घण्टाभित्र आगो नियन्त्रणमा लिए तापनि त्यसअघि नै ठूलो मानवीय क्षति भइसकेको थियो। आगलागी भएको बारलाई स्थानीय रूपमा रोङ बियर ना लाट फ्राओ (Rong Beer Na Lat Phrao) भनेर चिनिन्छ।
आगलागी भएको बारको फर्निचर, भित्ताहरू र छत पूर्ण रूपमा जलेको देखिन्छ। बारभित्र प्रयोग भएका अत्यधिक ज्वलनशील सजावटका सामग्रीका कारण आगो तीव्र गतिमा फैलिएको प्रारम्भिक अनुमान गरिएको छ। प्रत्यक्षदर्शीका अनुसार सोमबार राति करिब ११:३० बजे त्यहाँबाट गुज्रिरहेका एक चालकले बारमा आगो लागेको देखेपछि तुरुन्त दमकललाई खबर गरेका थिए।
