हिंसाबाट पीडित बालबालिकालाई आश्रय मात्र होइन, आत्मनिर्भर जीवनको आधार प्रदान गरिन्छ
साथी चिल्ड्रेनले आफ्नो २५औं स्थापना दिवस मनाउँदै हालसम्म ४०० भन्दा बढी बालबालिकालाई शिक्षा र सीपमार्फत आत्मनिर्भर बनाएको जनाएको छ। काठमाडौं। लैङ्गिक हिंसामा परेका महिला र उनीहरूसँग आएका बालबालिकालाई तत्काल आश्रय दिने उद्देश्यले सुरु गरिएको कार्यक्रम अहिले आत्मनिर्भर बनाउन केन्द्रित अभियानमा परिणत भएको छ। हिंसाबाट प्रभावित बालबालिकाका लागि काम गर्दै आएको ‘साथी चिल्ड्रेन’ले पछिल्लो २५ वर्षमा ४०० भन्दा बढी बालबालिकालाई शिक्षा, सीप र सुरक्षित भविष्यतर्फ डोर्याएको जनाएको छ। आइतबार आफ्नो २५औं स्थापना दिवस मनाउँदै साथी चिल्ड्रेनले यो जानकारी सार्वजनिक गर्यो।
साथी संस्थाले सन् १९९२ मा हिंसामा परेका महिला र लागुऔषधका लागि पहिलो आश्रयस्थल सञ्चालन गरेको थियो। त्यसपछि आमासँग आएका बालबालिकाको संरक्षण आवश्यक देखिएपछि सन् २००१ देखि ‘साथी चिल्ड्रेन’ कार्यक्रम सुरु गरियो। अहिले काठमाडौं, नेपालगन्ज, बारा र कञ्चनपुरमा बालक तथा बालिकाका लागि छुट्टाछुट्टै आवासीय संरक्षण केन्द्रहरू सञ्चालनमा छन्। कार्यक्रम संयोजक अन्जु सिंहका अनुसार संस्थाले बालबालिकालाई माध्यमिक तहदेखि स्नातक तहसम्म अध्ययनको अवसर उपलब्ध गराउँदै आएको छ। यसका साथै प्लम्बिङ, सिलाई, कम्प्युटर, होटल व्यवस्थापन लगायतका सीपमूलक तालिमहरू पनि प्रदान गर्दै आएको छ।
‘१८ वर्ष पुगेपछि बाहिर पठाउने होइन, उनीहरू आफ्नै खुट्टामा उभिन सक्ने अवस्थामा नभएसम्म हामी साथ दिन्छौं’ सिंहले बताइन। हाल संस्थाका विभिन्न आवासीय केन्द्रहरूमा २०० भन्दा बढी बालबालिका र किशोरकिशोरी बसोबास गर्दै आएका छन्। २५ वर्षको अवधिमा ४०० भन्दा बढी बालबालिकाले यहाँबाट शिक्षा र सीप हासिल गरी आत्मनिर्भर जीवन सुरु गरिसकेका छन्, संस्थाले जनाएको छ। संस्थाबाट लाभान्वित राजन गहतराजले साथीको सहयोगका कारण आफूले शिक्षा र सीप हासिल गरी अहिले परिवारसहित सम्मानपूर्वक जीवन बिताउन सकेको बताए।
‘साथीले नपढाएको र सीप नदिएको भए आज म आफ्नै घर बनाएर परिवारसँग बस्न सक्ने स्थितिमा पुगेको हुन्थेन,’ उनले भने। विनिता सुचीकार, सोनिया श्रेष्ठ र अनिलकुमार सार्कीले पनि संस्थाको सहयोगमा उच्च शिक्षा हासिल गरेको अनुभव सुनाए। कार्यक्रममा फ्रान्सेली फार्मासिस्ट जिन–मिशेल पेनीलाई संस्थाको दीर्घकालीन सहयोगका लागि विशेष सम्मान गरिएको थियो। उनले स्थापना गरेको स्मार्ट फार्मा कम्पनीको नाफा तथा आफ्ना परिवार र कर्मचारीहरूबाट सङ्कलित रकममार्फत प्रत्येक वर्ष साथीलाई आर्थिक सहयोग गर्दै आएका छन्।
‘बालबालिकाको जीवन छोटो, परियोजनाले परिवर्तन हुँदैन,’ उनले भने, ‘उनीहरू उच्च शिक्षा र सीप हासिल गरेर सक्षम नागरिक नबन्दा सम्म मेरो सहयोग निरन्तर रहनेछ।’ ललितपुर महानगरपालिकाका प्रमुख चिरीबाबु महर्जनले महानगरले महिला, बालबालिका र ज्येष्ठ नागरिक लक्षित सामाजिक कार्यक्रमहरूलाई प्राथमिकतामा राख्दै आएको बताए। साथी संस्थाकी अध्यक्ष सजनी अमात्यले हिंसामा परेका महिला, अभिभावकविहीन बालबालिका, सडक बालबालिका तथा आमासँग मात्रै आश्रित बालबालिकालाई सुरक्षित संरक्षण, शिक्षा र आत्मनिर्भर जीवनतर्फ अघि बढाउनु संस्थाको मुख्य उद्देश्य रहेकाले यो अभियान जारी रहने बताइन्।
