प्रतियोगितामा उत्कृष्ट प्रदर्शन गर्ने खेलाडीले गोल्डेन बल अवार्ड प्राप्त गर्छन्। को बन्ला विश्वकपको उत्कृष्ट खेलाडी? कसले पाउला गोल्डेन बल? यो पनि चासोको विषय बनेको छ। फिफा विश्वकप २०२६ को उपाधिका लागि अर्जेन्टिना, फ्रान्स, स्पेन र इंग्ल्यान्ड गरी चार टोली सेमिफाइनलमा पुगेका छन्। गोल्डेन बल अवार्डका लागि किलियन एमबाप्पे, लियोनल मेसी, लामिन यमाल, माइकल ओलिसे, जुड बेलिङघम र ह्यारी केन मुख्य दाबेदारका रूपमा देखिएका छन्। विश्वकपमा सर्वाधिक गोल र असिस्टका आधारमा खेलाडीहरूको प्रदर्शनलाई गोल्डेन बलको छनोटका लागि निर्णायक मानिएको छ। २९ असार, काठमाडौं।
फिफा विश्वकप २०२६ को अन्त्यतिर आइपुग्दा उपाधिका लागि चार टिम बाँकी छ। साविक विजेता अर्जेन्टिना, साविक उपविजेता फ्रान्ससँगै स्पेन र इंग्ल्यान्ड उपाधि होडमा छन्। उत्कृष्ट तीन खेलाडीले क्रमशः गोल्डेन बल, सिल्भर बल र ब्रोन्ज बल प्राप्त गर्नेछन्। किलियन एमबाप्पे, फ्रान्सका कप्तान र मुख्य गोल स्कोरर हुन्। यस पटक उत्तर अमेरिकामा भइरहेको २३औं संस्करणको विश्वकपमा २७ वर्षीय एमबाप्पेले उत्कृष्ट प्रदर्शन गरिरहेका छन्। उनले अहिलेसम्म ६ खेलमा ८ गोल गर्दै सर्वाधिक गोलकर्ताको सूचीमा पनि अघि छन्। उनले ३ असिस्ट समेत गरेका छन्।
लियोनल मेसी, अर्जेन्टिना फिफा विश्वकपको साविक विजेता अर्जेन्टिनाका कप्तान हुन्। मेसी एक मात्र त्यस्ता खेलाडी हुन् जसले दुई पटक सन् २०१४ र २०२२ मा गोल्डेन बल अवार्ड जितेका थिए। उत्तर अमेरिकामा जारी विश्वकपमा पनि मेसीले शानदार प्रदर्शन गरिरहेका छन् र सेमिफाइनलसम्म आइपुग्दा ८ गोल र १ असिस्ट पनि गरेका छन्। ३९ वर्षको उमेरमा पनि मेसी मुख्य गोलकर्ताको रुपमा खेलिरहेका छन्।
लामिन यमाल, स्पेन उमेरले युवा र पहिलो पटक विश्वकप खेलिरहेपनि मैदानमा गर्ने प्रदर्शन र चर्चाको आधारमा लामिन यमाल कुनै स्टारभन्दा कम छैनन्। १८ वर्षको उमेरमै ठूलो सफलता हात पारिसकेका यमाल अहिले स्पानिस टिमको पनि महत्वपूर्ण खेलाडी हुन्। माइकल ओलिसे, फ्रान्सका प्लेमेकर हुन् र उनले ६ खेलमा ५ असिस्ट गरिसकेका छन्। जुड बेलिङघम, इंग्ल्यान्डका मिडफिल्डरले राउन्ड अफ १६ र क्वाटरफाइनलमा २-२ गोल गरेपछि गोल्डेन बलका लागि दाबेदारका रूपमा देखिएका छन्। ह्यारी केन, इंग्ल्यान्डका कप्तानले ६ खेलमा ६ गोल गर्दै सर्वाधिक गोलकर्ताको सूचीमा पनि छन्।
