गुल्मी जिल्लालाई पुनः पूर्ण खोप दिगोपना सुनिश्चित जिल्ला को रूपमा औपचारिक रुपमा घोषणा गरिएको छ। लुम्बिनी प्रदेशका स्वास्थ्यमन्त्री रामजी घिमिरेले तम्घासमा आयोजित कार्यक्रममा खोप कार्यक्रमलाई बालबालिकाको स्वास्थ्य सुरक्षाको मुख्य आधार भएको बताएका छन्। जिल्लाका १२ वटै स्थानीय तहले आवश्यक मापदण्ड पुरा गरेपछि गुल्मीलाई पूर्ण खोप दिगोपना सुनिश्चित जिल्ला घोषणा गरिएको हो।
सोमबार तम्घासमा आयोजित विशेष कार्यक्रममा मन्त्री घिमिरेले जिल्लालाई पूर्ण खोप दिगोपना सुनिश्चित जिल्ला घोषणा गर्दै खोपको ठूलो महत्त्व रहेको उल्लेख गरेका छन्। उनले खोप कार्यक्रम बालबालिकाको स्वास्थ्य सुरक्षाको आधार भएको भन्दै सबै बालबालिकाले समयमै नियमित खोप पाउने वातावरण बनाउन स्थानीय तह, स्वास्थ्यकर्मी, जनप्रतिनिधि र समुदायबीच सहकार्य अझ सुदृढ गर्नुपर्ने बताए।
स्वास्थ्य कार्यालय गुल्मीकी जनस्वास्थ्य अधिकृत पुष्पा थापाले जिल्लामा खोप कार्यक्रममार्फत हासिल गरिएका उपलब्धि र दिगोपनाका लागि अवलम्बन गरिएका रणनीतिबारे जानकारी दिएकी थिइन्। पूर्ण खोप दिगोपना सुनिश्चित घोषणा गर्नुअघि जिल्लाका सबै वडा र १२ वटै स्थानीय तहले आवश्यक मापदण्ड पुरा गरी घोषणा गरिसकेका छन्। गुल्मी जिल्ला २०७१ साल चैत ३० गते नेपालकै सातौं पूर्ण खोप जिल्ला घोषणा भइसकेको थियो।
सम्बन्धित खबर
