ललितपुर महानगरपालिकाले भदौ १ गतेदेखि आफ्ना नागरिकहरूलाई घरमै स्वास्थ्य सेवा उपलब्ध गराउने निर्णय गरेको छ। नगरप्रमुख चिरिबाबु महर्जनका अनुसार, हटलाइन नम्बर ११३१ मा फोन गरेपछि चिकित्सक र आवश्यक सामग्रीसहितको स्वास्थ्य टोली बिरामीको घरमा पुग्नेछ। घरमै उपचार सम्भव नभएका बिरामीहरूलाई मात्र महानगरले अस्पतालमा रेफर गर्ने व्यवस्था मिलाएको छ।
पहिल्यै साउन १ गतेदेखि सेवा सञ्चालन गर्ने घोषणा गरिएको भए पनि केही काम बाँकी रहेका कारण भदौ १ गतेदेखि मात्र सेवा सुरु हुने नगरप्रमुख महर्जनले जानकारी दिए। नवौं नगरसभाबाट पारित आगामी आर्थिक वर्षको नीति तथा कार्यक्रम र बजेट सम्बन्धमा जानकारी दिँदै उनले भने, ‘चिकित्सक, आवश्यक औषधि र उपकरणसहित नि:शुल्क एम्बुलेन्स सेवा भदौ १ गतेदेखि सुरु गरिनेछ।’
महानगरले सञ्चालन गरेको हटलाइन नम्बर ११३१ मा फोन गरेपछि एम्बुलेन्स, डाक्टर, नर्स र आवश्यक औषधिसहितको स्वास्थ्य टोली बिरामीको घरमै पुग्ने व्यवस्था गरिएको छ। स्वास्थ्य टोलीले घरमै पुगेर बिरामीको आवश्यक स्वास्थ्य परीक्षण, परामर्श र प्राथमिक उपचार गर्नेछ। घरमै उपचार सम्भव नभएमा मात्र बिरामीलाई सम्बन्धित अस्पतालमा रेफर गरिनेछ। महर्जनले भने, ‘कसैको घरमा बिरामी पर्दा हटलाइन नम्बर ११३१ मा फोन गर्नासाथ चिकित्सक, नर्स र आवश्यक मेडिकल उपकरणसहितको टोली घरमै पुगेर उपचार सेवा प्रदान गर्नेछ। घरमै उपचार सम्भव नभएपछि मात्र अन्य अस्पतालमा पठाइने व्यवस्था गरिएको छ।’
