नेपाल राष्ट्र बैंकको प्रतिवेदन अनुसार रेमिट्यान्स र विदेशी मुद्रा सञ्चितिमा अभूतपूर्व वृद्धि हुँदा मुलुकको अर्थतन्त्रका बाहिरी सूचकहरू निकै बलिया देखिएका छन्। चालु आर्थिक वर्षको ११ महिनामा विदेशी मुद्रा सञ्चिति ३७ खर्ब ५५ अर्ब र रेमिट्यान्स आप्रवाह २१ खर्ब २० अर्ब रुपैयाँ बराबर पुगेको छ। बाहिरी पक्ष बलियो भए पनि आन्तरिक तहमा मुद्रास्फीति वृद्धि तथा बैंक कर्जा विस्तारमा सुस्तीका कारण अर्थतन्त्रका आन्तरिक सूचकहरू कमजोर देखिएका छन्। २९ असार, काठमाडौं।
मुलुकको अर्थतन्त्रका बाहिरी सूचकहरू बलिया देखिएका छन्, तर आन्तरिक सूचक भने कमजोर बनेका छन्। नेपाल राष्ट्र बैंकले सोमबार सार्वजनिक गरेको देशको चालू आर्थिक तथा वित्तीय स्थिति प्रतिवेदन अनुसार अर्थतन्त्रका बाहिरी सूचकहरू रेमिट्यान्स, विदेशी मुद्रा सञ्चिति, शोधनान्तर स्थिति र वैदेशिक व्यापारका मापदण्डहरू बलिया देखिएका छन्। तर, आन्तरिक सूचकहरूमा मुद्रास्फीति, बैंक कर्जा, ब्याजदर, आन्तरिक उत्पादन, लगानी, रोजगारी, राजस्व संकलन जस्ता पक्षहरूले पछिल्लो ११ महिनामा धेरै आशा व्यक्त गर्न सकिने अवस्था देखाएका छैनन्।
विदेशी मुद्रा सञ्चिति हालसम्मकै सबैभन्दा उच्च केन्द्रीय बैंकका अनुसार मुलुकमा विदेशी मुद्रा सञ्चिति रकम ३७ खर्ब ५५ अर्ब रुपैयाँ पुगेको छ, जुन यसअघि नभएको सर्वोच्च स्तर हो। ११ महिनाका अवधिमा यो सञ्चिति ४०.३ प्रतिशतले वृद्धि भएको हो। गत वर्ष असार मसान्तसम्म यो रकम २६ खर्ब ७७ अर्ब रुपैयाँ थियो। अमेरिकी डलरमा यो रकम सोही अवधिमा २६.५ प्रतिशतले बढेको छ।
रेमिट्यान्स आप्रवाह उल्लेखनीय रूपमा वृद्धिदरमा छ। चालु आर्थिक वर्षका ११ महिनामा २१ खर्ब २० अर्ब रुपैयाँ बराबरको रेमिट्यान्स भित्रिएको छ। यो आप्रवाह गत आवको सोही अवधिको तुलनामा ३८.२ प्रतिशतले बढी रहेको केन्द्रीय बैंकले जनाएको छ। जेठ २०८३ मा २ खर्ब ३ अर्ब ८९ करोड बराबरको रेमिट्यान्स भित्रिएको थियो।
