लगातार तेस्रोपटक विश्वकप फाइनलमा प्रवेश गर्ने लक्ष्यका साथ फ्रान्स एकतर्फ छ भने १६ वर्षपछि पुनः विश्वकप विजेता बन्ने अभियानमा रहेको स्पेन अर्कोतर्फ छ। फिफा विश्वकप २०२६ को पहिलो सेमिफाइनलमा मंगलबार फ्रान्स र स्पेनबीच भिडन्त हुँदैछ, जुन सम्पूर्ण विश्वमा ‘फाइनलअघिको फाइनल’ को रूपमा हेरिएको छ। लगातार तेस्रो पटक विश्वकप फाइनलमा पुग्ने प्रयासमा रहेको फ्रान्सका कप्तान किलियन एमबाप्पेले आगामी खेल अत्यन्त चुनौतीपूर्ण रहेको बताएका छन्। सन् २०१० पछि विश्वकप जित्ने प्रयासमा रहेको स्पेनका विङ्गर लामिन यामालले यो खेल आफ्नो जीवनकै सबैभन्दा ठूलो भएको प्रतिक्रिया दिएका छन्। ३० असार, काठमाडौं।
फिफा विश्वकप २०२६ निर्णायक चरणमा प्रवेश गरेको छ। उपाधि नजिक पुगेका फ्रान्स र स्पेनले मंगलबार पहिलो सेमिफाइनलमा आमनेसाम्ने हुनेछन्। विश्व फुटबलका शीर्ष राष्ट्रमध्येका यी दुई टोलीबीचको भिडन्तलाई ‘फाइनलअघिको फाइनल’ भनिएको छ। फ्रान्स प्रतियोगितामा सबैभन्दा खतरनाक आक्रमणकारी टोलीमध्ये पर्छ। कप्तान किलियन एमबाप्पेका नेतृत्वमा ओस्मान डेम्बेले, माइकल ओलिसे र डिजायर डुएले विपक्षी रक्षामा निरन्तर दबाब सिर्जना गर्दै आएका छन्। स्पेनले बल नियन्त्रणमा आधारित आफ्नो परम्परागत शैलीलाई यस विश्वकपमा अझ प्रभावकारी बनाएको छ।
फ्रान्सलाई रोक्ने सबैभन्दा ठूलो चुनौती एमबाप्पै हुनेछन्। प्रतियोगितामा आठ गोल गरिसकेका उनी गोल्डेन बुट पुरस्कारको दौडमा लियोनल मेसीसँग संयुक्त शीर्ष स्थानमा छन्। तर स्पेनसँग एमबाप्पेको गतिलाई नियन्त्रण गर्न सक्षम संरचित टोली र बल नियन्त्रण गर्ने दक्षता छ। धेरै विश्लेषकहरूले रोड्री र यामालको प्रदर्शनलाई निर्णायक पक्ष मानिरहेका छन्। दुवै टोलीबीच विश्वकपमा अहिलेसम्म एकपटक मात्रै भिडन्त भएको छ। सन् २००६ को अन्तिम १६ मा स्पेनले अग्रता लिए पनि फ्रान्सले ३–१ को जित निकाल्दै पुनरागमन गरेको थियो।
महत्त्वपूर्ण खेलअघि दुवै टोलीका नियमित खेलाडीमा चोट वा निलम्बनको कुनै समस्या छैन। फ्रान्सका कप्तान किलियन एमबाप्पेले अझै कडा परीक्षा बाँकी रहेको बताएका छन्। ‘हामी सेमिफाइनलमा पुगेका छौं र खुशी छौं, तर हाम्रो लक्ष्य पूरा भएको छैन। अब अझै कठिन परीक्षा बाँकी छ र त्यसका लागि हामी तयार छौं,’ उनले भने। संभावित सुरुवाती ११ फ्रान्स र स्पेनका लागि प्रस्तुत गरिएको छ। खेल मिति र समय: ३१ असार, बिहान १२:४५ बजे, स्थान: डलास स्टेडियम।
