सुदूरपश्चिम प्रदेशमा सत्ता समीकरण र बजेटबारे छलफल गर्न नेपाल कम्युनिस्ट पार्टी (नेकपा) संसदीय दलको बैठक सुरु भएको छ। एमालेले समर्थन फिर्ता लिएपछि मुख्यमन्त्री कमलबहादुर शाह नेतृत्वको सरकार अल्पमतमा परेको छ। मुख्यमन्त्री शाहलाई बिहीबार राति १२ बजेभित्र आगामी आर्थिक वर्षको बजेट पारित गरिसक्नुपर्ने संवैधानिक बाध्यता छ।
धनगढीमा बसेको बैठकमा पछिल्लो सत्ता समीकरण र बजेटसम्बन्धी विषयमा छलफल भइरहेको छ। बुधबार मुख्यमन्त्री शाहले एमालेका मन्त्रीहरूलाई बर्खास्त गरेपछि एमालेले सरकारलाई दिएको समर्थन फिर्ता लिएको थियो। त्यसपछि अल्पमतमा परेको मुख्यमन्त्री शाहले प्रमुख प्रतिपक्षी नेकपासँग सत्ता सहकार्यको प्रस्ताव गरेका छन्। उनले चालु बजेट पारित गर्न सहयोग गर्न र त्यसपछि सत्ता सहकार्य गर्ने प्रस्ताव अघि सारेका थिए, तर नेकपाले उक्त प्रस्ताव अस्वीकार गरेको थियो।
यद्यपि दुवै पक्षका नेताबीच सत्ता समीकरणबारे अनौपचारिक छलफल भने जारी छ। यसअघि एमालेले आर्थिक वर्ष २०८३/८४ को बजेटप्रति असहमति जनाउँदै खर्च कटौतीको प्रस्ताव दर्ता गरेको थियो। सोही विषयलाई लिएर कांग्रेस र एमालेबीच विवाद चर्किएपछि दुवै दलको सत्ता सहकार्य समाप्त भएको हो। यदि निर्धारित समयभित्र बजेट पारित नभए र सरकारले पेश्की बजेटसमेत ल्याउन नसके प्रदेशमा बजेट शून्यता (Budget Vacuum) को अवस्था सिर्जना हुने जोखिम छ।
