म्याद नाघेका फ्यान्टा र स्प्राइट बेच्नेलाई केबी एग्रो मार्टलाई २ लाख ५ हजार रुपैयाँ जरिवाना

वाणिज्य, आपूर्ति तथा उपभोक्ता संरक्षण विभागले म्याद नाघेका खाद्य तथा पेय पदार्थ बिक्री गरेको आरोपमा चाबहिलस्थित केबी एग्रो हाम्रो मिट एन्ड मार्टलाई २ लाख ५ हजार रुपैयाँ जरिवाना गरेको छ। अनुगमनका क्रममा उक्त मार्टमा उपभोग्य मिति सकिएका रश बदाम ड्रिंक, फ्यान्टा र स्प्राइट जस्ता पेय पदार्थहरू फेला परेपछि उपभोक्ता संरक्षण ऐन बमोजिम कारबाही गरिएको हो।

विभागले उक्त दिन काठमाडौं र ललितपुरका १० वटा अन्य फर्म तथा उद्योगहरूमा पनि अनुगमन गरी आवश्यक सुधारका लागि निर्देशन दिएको थियो। अनुगमनको क्रममा काठमाडौं महानगरपालिका–६ चाबहिलमा सञ्चालित केबी एग्रो हाम्रो मिट एन्ड मार्टले उपभोक्ताको स्वास्थ्यमा गम्भीर असर पुर्‍याउने गरी म्याद नाघेका सामग्री बिक्रीमा राखेको पाइएछ।

मार्टमा ‘रश बदाम ड्रिंक’, ‘फ्यान्टा’ र ‘स्प्राइट’ जस्ता पेय पदार्थ उपभोग्य मिति सकिए पनि बिक्रीका लागि राखिएको कुरा भेटिएको थियो। उपभोक्ता संरक्षण ऐन २०७५ को दफा १६ को उपदफा २ को खण्ड (क) अनुसार कसुर गर्नेजस्तै पाइएपछि विभागले सोही ऐनको दफा ३९ (१) (ख) को अधिकार प्रयोग गरी उक्त मार्टलाई २ लाख ५ हजार रुपैयाँ जरिवाना गरेको हो।