अनुभवी लियोनल मेसीले आफ्नो ऐतिहासिक करियरमा अर्को स्वर्णिम अध्याय थप्ने प्रयास गर्नेछन् भने १८ वर्षे लामिन यमालले विश्व फुटबलको नयाँ युग सुरु गर्ने लक्ष्यसहित मैदानमा उत्रनेछन्। फिफा विश्वकप २०२६ को उपाधि जित्न सोमबार बिहान अर्जेन्टिना र स्पेनबीच न्युयोर्कको न्यु जर्सी स्टेडियममा फाइनल खेल हुँदैछ। लगातार दोस्रो पटक विश्वकप जित्ने लक्ष्य राखेको अर्जेन्टिना र १६ वर्षपछि उपाधिको खोजीमा रहेको स्पेनबीच कडा प्रतिस्पर्धा हुने अपेक्षा गरिएको छ। लियोनल मेसीको कप्तानीमा रहेको अर्जेन्टिना र युवा खेलाडीले भरिएको स्पेनका लागि यो खेल फुटबलको भविष्य निर्धारण गर्ने निर्णायक प्रतिस्पर्धा हुनेछ। ३ साउन, काठमाडौं। ४८ टोली, १०४ खेल र अन्त्यमा एक विजेता। ९६ वर्षको विश्वकप इतिहासको २३औं संस्करणले यस्तो मोडमा पुगेको छ जहाँ नयाँ इतिहास लेखिनसक्ने तयारी छ। एउटा टोली लगातार दोस्रो विश्वकप जित्ने दुर्लभ उपलब्धि हासिल गर्ने तयारीमा छ भने अर्को टोली १६ वर्षपछि फेरि विश्व फुटबलको सर्वोच्च स्थानमा फर्किने सपना बोकेर मैदानमा उत्रनेछ।
अर्जेन्टिना आठौं पटक विश्वकप फाइनल खेल्न लागेको छ, जसको केन्द्रबिन्दुमा अझै पनि लियोनल मेसी छन्। अर्कोतर्फ, युवा जोश, तीव्र आक्रमण र आकर्षक खेल शैली प्रस्तुत गर्दै विश्वलाई प्रभावित पार्ने स्पेन छ, जसले आफ्नो दोस्रो विश्वकप उपाधि जित्ने अवसर खोजिरहेको छ। अमेरिकाको न्युयोर्क–न्यु जर्सी स्टेडियममा सोमबार बिहान हुने फिफा विश्वकप २०२६ को फाइनल खेल केवल दुई टोलीबीचको उपाधि भिडन्त मात्र होइन, दुई पुस्ता, दुई खेल शैली र फरक फुटबल दर्शनबीचको निर्णायक सङ्घर्ष पनि हुनेछ। अनुभवी मेसीले आफ्नो ऐतिहासिक करियरमा अर्को स्वर्णिम अध्याय थप्ने प्रयास गर्नेछन् भने १८ वर्षे लामिन यमालले विश्व फुटबलको नयाँ युगको सुरुवात गर्ने लक्ष्य राखेका छन्।
समूह चरणदेखि दुवै टोली अपराजित रहँदै आफ्नो उपाधि दाबेदार सावित भइसकेका छन्। अर्जेन्टिनाले कठिन नकआउट यात्रा पार गर्दै लगातार दोस्रो पटक फाइनलमा पुगेको हो भने स्पेनले नियन्त्रणमा आधारित आक्रामक फुटबल खेल्दै प्रतियोगिताकै सबैभन्दा प्रभावशाली टोलीको रूपमा स्थापित भएको छ। अब बाँकी छ केवल ९० मिनेट वा आवश्यक परे थपिने समय। त्यसपछि विश्वकप फुटबलले २३औं संस्करणको च्याम्पियन घोषणा गर्नेछ।
स्पेनको प्रभावशाली यात्रा: युरोपियन च्याम्पियन स्पेनले सेमिफाइनलमा उपाधिका मुख्य दावेदार फ्रान्सलाई पूर्ण नियन्त्रणमा राख्दै फाइनल यात्रा तय गरेको थियो। लामो समय बल आफ्नो नियन्त्रणमा राख्ने शैली र सटीक फिनिशिङका कारण स्पेनलाई प्रतियोगिताको सबैभन्दा सन्तुलित टोली मानिएको छ।
स्पेनले समूह ‘एच’ को सुरुवात भने सहज बनाएन। सबैलाई आश्चर्यमा पार्नेगरी केप भर्डेसँग गोलरहित बराबरी खेलेपछि, साउदी अरेबियालाई ४–० ले पराजित गर्यो र उरुग्वेसँग १–० को जित निकाल्दै समूह विजेता बन्यो। त्यसपछि अन्तिम ३२ मा अस्ट्रियालाई ३–० ले हराएको स्पेनले अन्तिम १६ मा पोर्चुगल र क्वार्टरफाइनलमा बेल्जियमलाई दुवै खेलमा अन्तिम समयमा मिकेल मेरिनोको निर्णायक गोलले पराजित गर्यो। प्रतियोगिताभर स्पेनले केवल एक मात्र गोल स्वीकारेको छ। अब सन् २०१० पछिको पहिलो विश्वकप फाइनलमा खेल्दै स्पेन दोस्रो पटक विश्व च्याम्पियन बन्ने लक्ष्यमा छ।
अर्जेन्टिनाको यात्रा भने स्पेनको तुलनामा धेरै कठिन रहेको छ। मेसीको कप्तानीमा अर्जेन्टिनाले समूह चरणका तीनै खेल जित्यो। अल्जेरियाविरुद्ध मेसीको ह्याट्रिक, अस्ट्रियाविरुद्ध दुई गोल तथा जोर्डनविरुद्ध उत्कृष्ट प्रदर्शनले समूह चरण सहज पार गर्यो। तर त्यसपछि प्रत्येक नकआउट चरणमा अर्जेन्टिनाले संघर्ष गर्नुपर्यो। अन्तिम ३२ मा केप भर्डेलाई अतिरिक्त समयमा ३–२ ले हराएको अर्जेन्टिनाले अन्तिम १६ मा इजिप्टविरुद्ध ७९औं मिनेटसम्म २–० ले पछि परेको अवस्थामा ऐतिहासिक पुनरागमन गर्यो। क्वार्टरफाइनलमा स्विट्जरल्यान्डलाई अतिरिक्त समयमा पराजित गरेको अर्जेन्टिनाले सेमिफाइनलमा इंग्ल्यान्डविरुद्ध पनि पुनरागमन गर्दै अन्ततः फाइनल यात्रा तय गर्यो।
अर्जेन्टिनाका लागि मेसीसँगै जुलियन आल्भारेज, लाउतारो मार्टिनेज, एन्जो फर्नान्डेज र गोलकिपर एमिलियानो मार्टिनेज पनि मुख्य खेलाडी हुनेछन्। स्पेनका युवा स्टार लामिन यमाल, कप्तान रोड्री, डानी ओल्मो र सेन्टरब्याक जोडी आयमेरिक लापोर्टे–पाउ कुबार्सी निर्णायक भूमिका खेल्न सक्छन्।
स्पेनको सम्भावित एघार: उनी सिमोन; पेड्रो पोरो, आयमेरिक लापोर्टे, पाउ कुबार्सी, मार्क कुकुरेला; रोड्री, फाबियन रुइज; लामिन यमाल, डानी ओल्मो, एलेक्स बाएना; मिकेल ओयरजाबाल।
अर्जेन्टिनाको सम्भावित एघार: एमिलियानो मार्टिनेज; नाहुएल मोलिना, क्रिस्टियन रोमेरो, लिसान्द्रो मार्टिनेज, निकोलास टालियाफिको; लिआन्ड्रो पारेडेस, एलेक्सिस म्याक एलिस्टर, एन्जो फर्नान्डेज, जुलियानो सिमियोने; लियोनल मेसी, जुलियन आल्भारेज।
खेलः स्पेन विरुद्ध अर्जेन्टिना
फाइनल मिति र समयः ४ साउन बिहान १२:४५ बजे
स्थानः न्युयोर्क न्यु जर्सी स्टेडियम
प्रत्यक्ष प्रसारणः हिमालय स्पोर्ट्स
