रसियाले युक्रेनको राजधानी कीयभमा गणना बलिस्टिक क्षेप्यास्त्र प्रहार गर्दा एक जनाको मृत्यु हुने र कम्तीमा १४ जना घाइते भएको अधिकारीहरूले जनाएका छन्। कीयभ क्षेत्रका विभिन्न स्थानहरूमा रातभरि आक्रमणहरू भएका थिए। युक्रेनी राष्ट्रपति भोलोदिमिर जेलेन्स्कीले कीयभमा भएको आक्रमणलाई रसियाले युक्रेनमाथि पूर्णस्तरको आक्रमण सुरु गरेयता “सबैभन्दा ठूलोहरु मध्येको” बलिस्टिक आक्रमण भनेका छन्।
रसियाले प्रहार गरेका ४१ मध्ये १८ वटा क्षेप्यास्त्र युक्रेनको हवाई प्रतिरक्षा प्रणालीले निस्तेज पारेको युक्रेनी सेनाले जनाएको छ। त्यसैगरी १०८ वटा ड्रोन पनि खसालिएको बताइएको छ। युक्रेनले पनि रसियाका निशानाहरूमा आक्रमण जारी राखेको छ। युक्रेनी सेनाले ‘ब्ल्याक सी’ मा रहेको दुई वटा रसिया तेल ट्याङ्करमा ड्रोन प्रहार गरिएको जनाएको छ। काजाखस्तानबाट ब्ल्याक सी हुँदै रसिया सम्म तेल पुर्याउन प्रयोग हुने बन्दरगाहको टर्मिनलमा आक्रमण भएको पाइपलाइन सञ्चालकले पुष्टि गरेको छ। यद्यपि कुनै मानवीय क्षति वा तेल चुहावट नभएको उक्त कम्पनीले जनाएको छ।
अर्को घटनामा, रसियाको दक्षिणपश्चिमी स्ताभ्रोपुल क्षेत्रका गभर्नरले ड्रोन आक्रमणका कारण एक औद्योगिक पार्कमा आगलागी भएको बताएका छन्। युक्रेनी वायुसेनाका अनुसार कीयभमाथिको पछिल्लो आक्रमणमा रसियाले इस्कन्दर र हाइपरसोनिक जिर्कोन क्षेप्यास्त्र लगायतका अस्त्र प्रयोग गरेको थियो। कीयभका महापौर भिताली क्लित्स्कोले पछिल्ला आक्रमणहरूमा आवासीय र गैरआवासीय दुवै किसिमका भवनहरूमा क्षति पुगेको आइतबार बताएका छन्।
टेलिग्राममा जारी गरिएको सन्देशमा जेलेन्स्कीले एक सातामा रसियाले युक्रेनविरुद्ध आक्रमणका लागि “करिब १,४५० वटा ड्रोन, १,६४० भन्दा बढी बम र विभिन्न प्रकारका ९९ वटा क्षेप्यास्त्र” प्रयोग गरेको बताएका छन्। युक्रेनले रसियाको सबैभन्दा ठूलो अनलाइन खुद्रा विक्रेता कम्पनी वाइल्डबेरीजका दुई वटा छुट्टाछुट्टै गोदाममा गरेको ड्रोन आक्रमणमा आठ जनाको मृत्यु भएको थियो। भोलीपल्ट रसियाले युक्रेनको राजधानीमा आक्रमण गरेको थियो। मस्कोबाट करिब ४७५ किलोमिटर दक्षिण–पूर्वमा रहेको ताम्बोफ सहरको गोदाममा सात जनाको मृत्यु भएको थियो। त्यहाँ अन्य २५ जना घाइते भएका थिए।
युक्रेनी राष्ट्रपति भोलोदिमिर जेलेन्स्कीले ड्रोन उत्पादनका लागि प्रतिबन्धित उपकरणहरू आपूर्तिमा प्रयोग गरिएको स्थानमा आक्रमण गरिएको दाबी गरेका छन्। वाइल्डबेरीजलाई ‘रुसी अमेजन’ नामले चिनिन्छ। युक्रेनले हालै रसियाको महत्त्वपूर्ण ऊर्जा पूर्वाधारमाथि ड्रोन आक्रमण तीव्र पारेको छ। युक्रेनी आक्रमणका कारण रसियामा इन्धन अभाव देखिएको छ। यसै महिनाको सुरुमा कीयभले रसियाको तेल प्रशोधन क्षमताको करिब ४३ प्रतिशत हिस्सा “निष्क्रिय बनाइएको” दाबी गरेको थियो।
