फ्रान्सलाई उपाधि जिताउन सकेनन्, सर्वाधिक गोल र लगातार दोस्रो गोल्डेन बुटमा कीर्तिमान स्थापित
लगातार दुई पटक विश्वकप फाइनल खेल्दै एक पटक उपाधि र एक पटक गोल्डेन बुट अवार्ड जितिसकेका किलियन एमबाप्पेले यसपटक फ्रान्सलाई फाइनल पुर्याउन भने सकेनन्, तर लियोनल मेसीलाई पछि पार्दै विश्वकप इतिहासका सर्वकालीन सर्वाधिक गोलकर्ता बने। किलियन एमबाप्पेले यस विश्वकपमा १० गोल गर्दै लगातार दुई पटक गोल्डेन बुट जित्ने पहिलो खेलाडी बनेका छन्। उनले २२ विश्वकप खेलमा २२ गोल गर्दै लियोनल मेसीको २१ गोलको कीर्तिमान तोडेर सर्वाधिक गोलकर्ता बनेका छन्। फ्रान्सेली कप्तान एमबाप्पेले राष्ट्रिय टोलीबाट १०६ खेल खेल्दै ६६ गोलको कीर्तिमान कायम गरेका छन्। ४ साउन, काठमाडौं।
फिफा विश्वकप सुरु हुनुअघि साविक उपविजेता फ्रान्सलाई सबैभन्दा बलियो दावेदारका रूपमा हेरिएको थियो। स्टार खेलाडीहरूको टोली फ्रान्सेली टिमको नेतृत्व २७ वर्षीय किलियन एमबाप्पेले गरेका थिए। समूह चरणदेखि नकआउट चरणसम्म फ्रान्सको प्रदर्शन प्रभावशाली रह्यो। प्रिक्वाटरफाइनलमा पाराग्वेको सामना गर्दा केही संघर्ष भएको भए पनि सेमिफाइनलसम्म एमबाप्पेले टिमलाई राम्रो नेतृत्व दिएका थिए। तर अल युरोपियन सेमिफाइनलमा स्पेनसँग २-० ले पराजित हुँदै फ्रान्स उपाधि होडबाट बाहिरियो।
एमबाप्पेले सन् २०१८ मा १९ वर्षको उमेरमै फ्रान्सबाट विश्वकप उपाधि जितेका थिए। चार वर्षपछि कतारमा आयोजित विश्वकपमा एमबाप्पे थप परिपक्क भई फ्रान्सलाई फाइनलसम्म पुर्याउँदै गोल्डेन बुट अवार्ड जितेका थिए। त्यस फाइनलमा अर्जेन्टिना विरुद्ध ह्याट्रिक गरे पनि पेनाल्टी शूटआउटमा फ्रान्स हार्दा एमबाप्पे लगातार विश्वकप ट्रफी उचाल्नबाट बन्चित भए। उनले विश्वकपमा २२ खेलमा २२ गोल गर्दै सबैभन्दा बढी गोल गर्ने खेलाडी बनेका छन्।
