भारतीय संसदमा विद्यार्थीमाथि लाठीचार्जको मुद्दा उठ्यो, खड्गेले सरकारको कडा आलोचना गरे

भारतीय कांग्रेसका अध्यक्ष मल्लिकार्जुन खड्गेले सोमबार संसदमा सीजेपी प्रदर्शनकारीमाथि भएको लाठीचार्जको विषय उठाउनुभयो। उहाँले राज्यसभामा भन्नुभयो, ‘पेपर लिक प्रकरणमा जन्तर-मन्तरमा भेला भएका हजारौं बालबालिकामाथि लाठीचार्ज गरिएको छ। मोदी सरकार युवाहरुको आवाज दबाउने प्रयासमा छ।’

खड्गेले संसद भवन बाहिर मिडियासँग कुरा गर्दै बेरोजगारी र परीक्षा सञ्चालनमा सरकार असमर्थ रहेको भन्दै सरकार सत्तामा रहन योग्य नभएको टिप्पणी गर्नुभयो। सीजेपीले संसदमा युवाको मुद्दा उठाएकोमा खड्गेलाई धन्यवाद दिएको छ।

उहाँले थप्नुभयो, ‘जो विद्यार्थी र युवाहरु दिल्ली आएर आफ्नो आवाज उठाउन चाहन्छन्, तिनीहरुलाई मार्नु र दुख दिनु गलत हो। यस विषयमा हामीले सरकारको ध्यानाकर्षण बारम्बार गराएका छौँ तर सरकारलाई केही फरक परेको छैन। एकातिर बेरोजगारी छ भने अर्कोतिर सरकारले परीक्षा सञ्चालन गर्न समेत सकेको छैन।’

सीजेपीको ‘संसद मार्च’ का क्रममा प्रहरीले प्रदर्शनकारीमाथि लाठीचार्ज गरेको थियो र अश्रुग्यास प्रयोग गरिएको थियो।