स्याङ्जाको डिभिजन वन कार्यालयले आर्थिक वर्ष २०७९/८० मा ३६ हजार ६ सय २० बिरुवा उत्पादन गरेको छ। कार्यालयले २२ हजारभन्दा बढी रैथाने प्रजातिका बिरुवा स्थानीय तह, विद्यालय र कृषक समूहलाई निःशुल्क वितरण गरिसकेको छ। वन अधिकृत रुक्मागत सुवेदीले भने, ‘यस वर्ष हामीले रैथाने प्रजातिका बिरुवालाई प्राथमिकता दिएका छौं।’
असार र साउन महिनामा बिरुवा वितरण गर्दै आएको कार्यालयले यस वर्ष उत्पादन गरिएका अधिकांश बिरुवा रैथाने प्रजातिका रहेको जनाएको छ। अघिल्लो वर्ष उत्पादन भएका करिब १५ हजार बाँकी रहेका बिरुवा पनि यस वर्ष वितरणको क्रममा रहेका छन्। सुवेदीका अनुसार, ‘हरेक वर्ष असार १५ गतेदेखि वितरण सुरु हुन्छ र भदौको दोस्रो साता सम्म निरन्तर वितरण गर्दै आएको छ।’
असार मसान्तसम्म ७ सय ७१ जनाले कार्यालयबाट हस्ताक्षर गरेर बिरुवा लिएर गएका छन्। कार्यालयले विभिन्न प्रजातिका बिरुवा वितरण गर्दै आएको छ, जसमा जडीबुटी, फलफूल, डालेघाँस र काठजन्य बिरुवा समावेश छन्। स्याङ्जाका डिभिजनल वन अधिकृत नवराज बरालले भने, स्थानीय तहले राजमार्ग र ग्रामीण सडक किनार हराभरा बनाउने अभियानका लागि ठूलो परिमाणमा बिरुवा लैजान थालेका छन्।
विद्यालय र सरकारी कार्यालय परिसरमा पनि जडीबुटी तथा अन्य रैथाने प्रजातिका बिरुवा रोप्ने क्रम बढ्दै गएको छ। विभिन्न समूह र व्यक्तिगत कृषकहरूले पनि घाँस तथा अन्य उपयोगी बिरुवा माग गरेर लैजाने गरेको कार्यालयले जनाएको छ। वन कार्यालयले निःशुल्क बिरुवा वितरण कार्यक्रमलाई वन संरक्षण, हरियाली प्रवर्द्धन, वातावरणीय सन्तुलन कायम राख्ने र कृषकलाई बहुउपयोगी बिरुवा उपलब्ध गराउने उद्देश्यसहित निरन्तर सञ्चालन गर्दै आएको छ।
सम्बन्धित खबर
