समाचार सारांश संपादकीय समीक्षा पश्चात तयार। नेपाली राष्ट्रिय टोलीका अलराउन्डर दीपेन्द्र सिंह ऐरी क्यानडामा हुने सुपर-६० क्रिकेट लिगमा भ्यान्कुभर एंकर्सबाट खेल्ने भएका छन्। युवराज सिंहको नेतृत्वमा संचालित यो फ्रेन्चाइज प्रतियोगिता १० ओभरको हुनेछ र यसमा ६ टोली सहभागी हुनेछन्। भ्यान्कुभर टोलीले दीपेन्द्रको विस्फोटक ब्याटिङ र बलिङले आफ्नो टोली बलियो बनाइने विश्वास व्यक्त गरेको छ। ५ साउन, काठमाडौं। नेपाली राष्ट्रिय क्रिकेट टोलीका अलराउन्डर दीपेन्द्र सिंह ऐरी क्यानडामा आयोजना हुने सुपर–६० क्रिकेट लिगमा भ्यान्कुभर एंकर्सबाट खेल्ने भएका छन्। भ्यान्कुभरले सामाजिक सञ्जालमार्फत दीपेन्द्रलाई टोलीमा स्वागत गर्दै उनले विश्वस्तरिय अलराउन्डरका रूपमा उत्कृष्ट खेल प्रदर्शन गर्ने विश्वास व्यक्त गरेको छ। क्लबले दीपेन्द्रको विस्फोटक ब्याटिङ, उपयोगी बलिङ र उत्कृष्ट खेल कौशलले टोली अझ बलियो हुने उल्लेख गरेको छ। दीपेन्द्र हाल नेपाली क्रिकेटका सबैभन्दा प्रभावशाली खेलाडीहरू मध्ये एक हुन्। पछिल्लो समय उनले अन्तर्राष्ट्रिय क्रिकेटमा लगातार उत्कृष्ट प्रदर्शन गर्दै नेपाललाई महत्वपूर्ण जित दिलाएका छन्। विशेष रूपमा टी–२० क्रिकेटमा उनको आक्रामक ब्याटिङ र प्रभावशाली अफस्पिन बलिङ अन्तर्राष्ट्रिय स्तरमा चर्चित छन्। क्यानडा सुपर–६० नयाँ फ्रेन्चाइज क्रिकेट प्रतियोगिता हो जसमा १० ओभरको खेल हुनेछ र ६ फ्रेन्चाइज टोलीहरू सहभागी छन्। यो प्रतियोगिताको नेतृत्व भारतका पूर्व स्टार अलराउन्डर युवराज सिंहले गर्दै आएका छन्। आयोजकहरूले विश्व क्रिकेटका चर्चित खेलाडीहरू र उदाउँदो प्रतिभाहरूलाई एउटै मञ्चमा ल्याउने उद्देश्यले प्रतियोगिता सुरु गरेको बताएका छन्। प्रतियोगिताको आधिकारिक वेबसाइटमा भ्यान्कुभर टोलीलाई ‘भ्यान्कुभर किङ्स’ नामले उल्लेख गरिएको छ।
सम्बन्धित खबर
