स्पेनी पत्रकार, लेखक तथा राजनीतिक विश्लेषक रोजा मारिया आर्टालले लेखेकी छिन्, ‘डोनाल्ड ट्रम्प स्पेनको राष्ट्रिय फुटबल टोलीका सदस्य होइनन्। उनले हिजो राति यो कुरा स्वीकार गर्न केही समय लगाए।’ अमेरिकी राष्ट्रपति डोनाल्ड ट्रम्पले विश्वकप फाइनलमा स्पेनलाई ट्रफी हस्तान्तरण गर्दा मञ्चमा लामो समय बसेर असहज व्यवहार देखाएको भन्दै आलोचना भइरहेको छ। फिफा अध्यक्ष जियानी इन्फान्टिनोले पटकपटक हटाउन खोज्दा पनि ट्रम्प मञ्चबाट नहटेपछि उनी खेलाडीहरूको विजय उत्सवमा अवरोधक बनेको भनी विश्लेषकहरूले टिप्पणी गरेका छन्। ५ साउन, काठमाडौं। फिफा अध्यक्ष जियानी इन्फान्टिनोले अघिल्लो महिना दिएको मन्तव्यलाई सही साबित गर्दै अमेरिकी राष्ट्रपति डोनाल्ड ट्रम्प यसपटक विश्वकप फाइनलमा ट्रफी हस्तान्तरणमा सरिक भए। फुटबल क्षेत्रका जानकारहरूले फिफामा बिस्तारै राजनीतिको प्रवेश हुँदै गएको प्रतिक्रिया जनाएका थिए।
तर, आलोचनाका बाबजुद पनि यो विश्वकप ट्रम्पले मन पराउने शैलीमै अन्त्य भएको छ। विजेता स्पेनको टोलीले विश्वकप ट्रफी उचालेर सुनौलो कागजी वर्षामा रमाइरहँदा यस वर्षामा ट्रम्प पनि भिजेका छन्। स्पेनलाई विश्वकप ट्रफी प्रदान गरेपछि ट्रम्प मञ्चमा केही बेर रोकिए। स्पेनका कप्तान रोड्रीले उनलाई केही असहज रूपले हेरेका थिए। ट्रम्पले यसअघि जुलाई २०२५ मा न्युजर्सीको मेटलाइफ रङ्गशालामा फिफा क्लब विश्वकपको फाइनल खेलमा पनि लगभग यस्तै व्यवहार देखाएका थिए।
प्रतियोगिताकै उत्कृष्ट खेलाडी घोषित भएका कोल पाल्मरले पछि भने, ‘उनी यहाँ आउँदै छन् भन्ने मलाई थाहा थियो। तर हामीले ट्रफी उचाल्ने बेलासम्म उनी मञ्चमै रहनेछन् भन्ने थाहा थिएन। त्यसैले म अलि अलमल्ल परेँ।’ तर यसपटक ट्रम्प मैदानमा प्रवेश गर्दा दर्शकहरूले उनीविरुद्ध हुटिङ गरेका थिए। ट्रम्पले यो प्रतियोगितालाई आफ्नो कार्यकालको एउटा मुख्य कार्यक्रमका रूपमा हेरेका थिए। खेलका क्रममा फक्स टेलिभिजनले ‘फ्रिडम २५० ग्रान्ड प्रिक्स’ को विज्ञापन प्रसारण गरेको थियो।
ट्रम्प यो विश्वकपभरि कतै न कतै आलोचित भइरहेका देखिन्छन्। इरानी फुटबल टोलीप्रति अमेरिकी प्रशासनले गरेको व्यवहारले ट्रम्प आलोचित भए। त्यस्तै अमेरिकाका मुख्य स्कोरर फोलारिन बालोगुनलाई बोस्नियाविरुद्धको खेलमा रातो कार्ड प्रकरणमा पनि उनी थप आलोचित बन्न पुगे। ट्रम्पको प्रभाव यो विश्वकपमा धेरै अघिदेखि नै परेको थियो।
स्पेनी पत्रकार, लेखक तथा राजनीतिक विश्लेषक रोजा मारिया आर्टालले ट्रम्पको व्यवहारलाई व्यङ्ग्य गर्दै लेखेकी छिन्, ‘डोनाल्ड ट्रम्प स्पेनको राष्ट्रिय फुटबल टोलीका सदस्य होइनन्। उनले विश्वकप फाइनलको राति यो कुरा स्वीकार गर्न केही समय लगाए।’ प्रख्यात जर्मन इतिहासकार डा. रेनर जिटेलम्यानले भनेका छन्, ‘धेरै मानिसहरूले उनलाई हटाउन खोज्दा पनि आफूले बाधा पुर्याइरहेको उनले महसुस नै गरेनन्।’
