थाइल्यान्डको दक्षिणी नारथिवाट प्रान्तस्थित सैनिक चौकीमा भएको बम आक्रमण र गोलीबारीमा पाँच सैनिकको मृत्यु भएको छ। आक्रमणमा १० वर्षीय बालकसहित छ जना सर्वसाधारण घाइते भएका छन् भनेर स्थानीय प्रशासनले जानकारी दिएको छ। सन् २००४ देखि जारी पृथकतावादी विद्रोहका कारण उक्त क्षेत्रमा अहिलेसम्म सात हजारभन्दा बढी मानिसको मृत्यु भइसकेको छ। ७ साउन, बैंकक (राससएएफपी)।
पृथकतावादी विद्रोहबाट प्रभावित दक्षिणी थाइल्याण्डमा सैनिक चौकीमाथि गरिएको गोलीबारी र बम आक्रमणमा पाँच सैनिकको मृत्यु भएको छ। सेनाका अनुसार पछिल्ला केही वर्षयताकै सबैभन्दा घातकमध्ये एक मानिएको उक्त घटनामा छ जना सर्वसाधारण पनि घाइते भएका छन्। आक्रमण बुधबार साँझ मुस्लिम बहुल नारथिवाट प्रान्तको बुखे सामी सुरक्षा चौकीमा भएको हो। स्थानीय अधिकारीहरूको अनुसार घाइतेमध्ये १० वर्षीय बालकसमेत छन् जसलाई खुट्टामा चोट लागेको छ।
नारथिवाट प्रान्तका गभर्नर बुनचुए होम्यामिनले अस्पताल पुगेर घाइतेहरूको अवस्थाबारे जानकारी लिएका छन्। नारथिवाट प्रशासनले सार्वजनिक गरेको सिसिटिभी तस्बिरमा साँझ करिब ६:४५ बजे कालो पोसाक लगाएका छ जना शङ्कास्पद व्यक्ति कालो पिकअप ट्रकमा घटनास्थल पुगेको देखिन्छ। घटनापछि ती व्यक्ति छिमेकी जिल्लातर्फ फरार भएका छन् र सुरक्षा निकायले व्यापक खोजी अभियान सञ्चालन गर्दै क्षेत्रलाई घेराबन्दी गरेको जनाएको छ।
थाई सेनाका अनुसार टास्क फोर्स रेन्जर रेजिमेन्ट–४५ का सैनिकहरू स्थानीय बासिन्दाको सुरक्षा गरिरहेका बेला आक्रमणकारीहरूले चौकीमा अन्धाधुन्ध गोली चलाएको साथै पाइप बम प्रहार गरेका थिए, जसका कारण पाँच सैनिकको मृत्यु भएको हो। घटनाको जिम्मेवारी अहिलेसम्म कुनै समूहले लिएको छैन र कसैलाई पक्राउ गरिएको पनि छैन। थाइल्याण्डका दक्षिणी नारथिवाट, याला र पट्टानी प्रान्तमा सन् २००४ देखि पृथकतावादी विद्रोह जारी छ। मुस्लिम बहुल यी क्षेत्रमा बढी स्वायत्तताको माग गर्दै सक्रिय विद्रोही समूहसँगको हिंसात्मक द्वन्द्वमा हालसम्म सात हजारभन्दा बढी मानिसको मृत्यु भइसकेको छ।
