भारतमा युवा आन्दोलन समर्थक सोनम वाङ्चुकले अनशन तोडे, कक्रोच पार्टीका नेताको प्रतिक्रिया के छ?

भारतका अभियानकर्मी सोनम वाङ्चुकले शिक्षामा सुधारको माग गर्दै युवाहरूले सुरु गरेको आन्दोलनको समर्थनमा गत २६ दिनदेखि गरिरहेको अनशन गएराति तोडेका छन्। सामाजिक सञ्जाल एक्समा पोस्ट गर्दै वाङ्चुक – जसलाई ‘सोनम सर’ भनेर चिनिन्छ – ले “विभिन्न सर्तहरूबारे लामा छलफल” र “देशमा सम्भावित हिंसा” रोक्न आफूले अनशन तोडेको बताएका छन्। ५९ वर्षीय वाङ्चुकले शिक्षामन्त्री धर्मेन्द्र प्रधानको राजीनामा माग गर्दै आएको कक्रोच जनता पार्टी (सीजेपी)को समर्थनमा अनशन सुरु गरेका थिए।

यसअघि वाङ्चुकले भनेका थिए कि अनशनका कारण उनको ११ किलो वजन घटेको छ तर “जीवित रहेको” बताएका थिए। गत शनिबार उनलाई दिल्लीस्थित अनशन स्थलबाट जबरजस्ती हटाएर अस्पताल लगिएको थियो। रिपोर्ट अनुसार सरकारले जन्तर मंतरमा विरोध प्रदर्शन गरिरहेका व्यक्तिहरूविरुद्ध कुनै कानुनी कारबाही नगर्ने आश्वासन दिएपछि वाङ्चुकले अनशन तोडेको जनाइएको छ। उनलाई अस्पतालमा भारतका मन्त्रीहरूले भेटेका थिए।

वाङ्चुकले अनशन तोड्ने निर्णय गरेपछि कक्रोच जनता पार्टीका नेताहरूले प्रतिक्रियासमेत दिएका छन्। सीजेपीका संस्थापक अभिजित दिप्केले एक्स सञ्जालमा लेखेका छन्, “२६ दिनपछि सोनम सरले अनशन तोड्नु भएकोमा हामीलाई राहत मिल्यो र हामी अनुग्रहीत छौं।” तर उनले थपेका छन्, “(शिक्षामन्त्री) धर्मेन्द्र प्रधानले राजीनामा नदिएसम्म जन्तर मंतरमा कक्रोच जनता पार्टीको शान्तिपूर्ण विरोध जारी रहने छ।” सोमबार संसद् तर्फ मार्चका क्रममा भएको प्रहरी दमनपछि पनि भारतको राजधानीमा अझै ठूलो प्रदर्शन रोकिएका छैनन्। प्रदर्शनका क्रममा सयौं प्रदर्शनकारी र प्रहरीले घाइते भएका छन्। अब सीजेपी भारतकै सबैभन्दा परिचित युवा आन्दोलन बनेको छ।