अन्तर्राष्ट्रिय गणित ओलम्पियाडमा नेपालको उत्कृष्ट सफलता, तीन विद्यार्थीले पदक जिते
चीनको साङ्घाईमा सम्पन्न ६७ औं अन्तर्राष्ट्रिय गणित ओलम्पियाड (आईएमओ) मा नेपाली टोलीले उत्कृष्ट प्रदर्शन गर्दै नयाँ इतिहास रचेको छ। नेपालले ५७ अंक प्राप्त गर्दै यसअघि हासिल गरेको ४६ अंकको कीर्तिमान तोडेको हो। प्रतियोगितामा सहभागी ११७ राष्ट्रमध्ये नेपाल ८४ औं स्थानमा रहँदै ३३ देशलाई पछि पार्न सफल भएको छ। नेपाली टोलीका प्रसिद्ध थापा, आयाम आचार्य र निसान खत्रीले अनरेबल मेन्सन पदक जित्दै नेपालको गौरव बढाएका छन्।
जुलाई १० देखि २० सम्म आयोजना गरिएको विश्वकै प्रतिष्ठित गणित प्रतियोगितामा सङ्खुवासभाकै प्रसिद्ध थापा, ललितपुरका आयाम आचार्य र धादिङका निसान खत्रीले समान रूपमा अनरेबल मेन्सन प्राप्त गर्दै नेपालको गौरव बढाएका हुन्। टोलीका अन्य सदस्य वर्दियाका मिसन जोशी, मोरङका युगान्तर कालाखेती र पोखराका अरिज पोख्रेलले पनि उत्कृष्ट प्रदर्शन गर्दै नेपालको समग्र अंक वृद्धि गर्न महत्वपूर्ण योगदान दिएका थिए।
म्याथम्याटिकल एसोसिएसन अफ नेपालका अध्यक्ष तथा कन्ट्री लिडर हरि प्रपन्न कँडेलले जानकारी दिए अनुसार, नेपालले ११७ सहभागी राष्ट्रमध्ये ३३ देशलाई पछि पार्न सफल भएको छ। नेपालले सन् २०१७ मा ब्राजिलमा आयोजित अन्तर्राष्ट्रिय गणित ओलम्पियाडबाट सहभागिता सुरु गरेको थियो। यस वर्षको प्रतियोगिता नेपालको दशौँ सहभागिता हो।
कार्यक्रम संयोजक तथा एसोसिएसनका महासचिव छवि ढुङ्गानाले बताए अनुसार, अन्तर्राष्ट्रिय स्तरमा अझ राम्रो नतिजा हासिल गर्न विद्यार्थीलाई नियमित राष्ट्रिय तथा अन्तर्राष्ट्रिय प्रशिक्षण उपलब्ध गराउनुका साथै सरकारी निकायबाट थप सहयोग आवश्यक छ। नेपाली टोली जुलाई २१ मा स्वदेश फर्किएको छ।
