इरानमाथि ठूलो आक्रमण गर्ने अमेरिकी चेतावनी, इरानले भने– मूल्य चुकाउनुपर्नेछ

अमेरिकी राष्ट्रपति डोनाल्ड ट्रम्पले इरानमाथि अझै ठूलो सैन्य कारबाही गर्ने चेतावनी दिएका छन् र तेहरानले पर्याप्त पीडा भोगेको छैन भनी दाबी गरेका छन्। ट्रम्पको यस भनाइपछि इरानका विदेशमन्त्री अब्बास अराघचीले कडा प्रतिक्रिया दिएका छन्। अमेरिकी सिनेटले युद्ध रोकिने प्रस्ताव अस्वीकृत गर्दै इरानविरुद्धको सैन्य अभियानका लागि ९५ अर्ब डलरको रक्षा बजेट स्वीकृत गरेको छ। ८ साउन, काठमाडौं।

अमेरिकी राष्ट्रपति डोनाल्ड ट्रम्पले इरानमाथि थप ठूलो सैन्य कारबाही गर्ने सोचमा रहेको बताएका छन्। तेहरानले अहिलेसम्म पर्याप्त पीडा भोगेको छैन भनी दाबी गर्दै ट्रम्पले पुनः ठूलो सैन्य अभियान सुरु गर्ने निर्णयको नजिक पुगेको जनाएका छन्। अमेरिकी केन्द्रीय कमाण्डले जुलाई २३ की रात इरानमाथि लगातार १३ औं रात हवाई आक्रमण गरेको जनाएको छ। सेन्टकमका अनुसार इरानका सैन्य कमाण्ड सेन्टर, ड्रोन भण्डारण केन्द्र, सञ्चार सञ्जाल, तटीय निगरानी स्थल र समुद्री क्षमताहरूलाई निशाना बनाइएको छ।

इरानको अर्ध–सरकारी सञ्चारमाध्यम ’तस्निम’ का अनुसार दक्षिण–पश्चिमी प्रान्त खुजेस्तानको अहवाज सहर नजिक अमेरिकी मिसाइल प्रहारमा ४ जनाको मृत्यु भएको छ भने ५ जना घाइते भएका छन्। ट्रम्पको यस भनाइपछि इरानका विदेशमन्त्री अब्बास अराघचीले कडा प्रतिक्रिया जनाउँदै अमेरिकाको विवेकहीन आक्रमकताले ट्रम्पलाई युद्ध समाप्तिका लागि अझै भयानक मूल्य चुकाउनुपर्ने चेतावनी दिएका छन्।

अमेरिकी वायुसेनाले इरानका मुख्य ५ वटा सहरहरू—खोंदाब, खोर्रमाबाद, कोनारक, जास्क र राजधानी तेहरानका विभिन्न स्थानहरूमा हमला गरेको छ। रणनीतिक दृष्टिले अत्यन्त संवेदनशील मानिने होर्मुज जलसन्धिनजिकै रहेको जास्क बन्दरगाहमा धेरै ठूलो विष्फोटहरू भएका छन्। तेहरानमा अमेरिकी विमान र मिसाइल रोक्न इरानी हवाई सुरक्षा प्रणाली सक्रिय पारिएको थियो। उत्तरी इराकमा खसालिएको एउटा इरानी ड्रोनको नफुटेको विष्फोटक पदार्थलाई नियन्त्रित रूपमा विस्फोट गराउने क्रममा एक अमेरिकी सैनिकको मृत्यु भएको छ भने अर्का एक घाइते भएका छन्। यसैसँगै यस युद्धमा ज्यान गुमाउने अमेरिकी सैनिकको संख्या १७ पुगेको छ।