नेपाल भलिबल लिगको पहिलो संस्करणका लागि आइतबार खेलाडी अक्सन आयोजना हुन लागेको छ। अक्सनमा १२९ खेलाडीले नाम दर्ता गराएका छन्, नेपाल भलिबल लिगले जानकारी दिएको छ। प्रतियोगिता भदौ १२ देखि २० गतेसम्म त्रिपुरेश्वरस्थित राष्ट्रिय खेलकुद परिषद् (राखेप) को कभर्ड हलमा सञ्चालन हुने तय गरिएको छ।
आगामी भदौ १२ गतेदेखि सुरु हुने पहिलो संस्करणको एनभीएलको अक्सन यही आइतबार आयोजना गरिने भएको छ। नेपाल भलिबल लिगका हेड अफ अपरेसन पुजन थापाले अक्सनका लागि १२९ खेलाडीले नाम दर्ता गराएको जानकारी दिएका छन्। उनका अनुसार क्याटेगोरी ‘ए’ मा ५६ र ‘बी’ मा ७३ खेलाडीले नाम दर्ता गराएका छन्।
छ वटा फ्रेन्चाइज टोली सहभागी हुने एनभीएलमा प्रत्येक टोलीले अक्सनबाट ७ जना खेलाडी अनुबन्ध गर्नेछन्। जसमा क्याटेगोरी ‘ए’ बाट ४ र ‘बी’ बाट ३ खेलाडीलाई टोलीमा समावेश गर्नुपर्ने हुन्छ। क्याटेगोरी ‘ए’ का खेलाडीका लागि न्यूनतम रकम एक लाख र अधिकतम एक लाख २० हजार तोकिएको छ भने क्याटेगोरी ‘बी’ का खेलाडीका लागि न्यूनतम ५० हजार र अधिकतम ७० हजार कायम गरिएको छ।
एनभीएलका प्रत्येक टोलीमा मार्की खेलाडीसहित १२ खेलाडी हुनेछन्। ७ खेलाडी अक्सनबाट छनोट हुनेछन्, ३ विदेशी खेलाडी अनुबन्ध गरिनेछन् र १ खेलाडी ट्यालेन्ट हन्टबाट चयन गरिनेछ। छैटाे टोलीले आफ्नो मार्की खेलाडी सार्वजनिक गरिसकेका छन्। सगरमाथा स्म्यासर्सको हरिहजुर थापा, मधेश वारियर्सका रविन नगरकोटी, काठमाडौं रेड्सका सुनिल बोहरा, अन्नपूर्ण स्पाइकर किङ्सका हिमाल सुनारी, कर्णाली शिवराजका पहल गहतराज र खप्तड फाल्कन्सका धिरज बस्नेत मार्की खेलाडीका रूपमा रहेका छन्।
केडिया ग्रुपको आयोजना रहेको यो पुरुष भलिबल फ्रेन्चाइज लिगको पहिलोपटक आयोजना भदौ १२ देखि २० गतेसम्म त्रिपुरेश्वरस्थित राष्ट्रिय खेलकुद परिषद् (राखेप) को बहुउद्देश्यीय कभर्ड हलमा हुनेछ।
