स्याङ्जा जिल्लाको पुतलीबजार नगरपालिका–८ मा रहेको बहाकोट कालिका मन्दिरलाई धार्मिक एवं पर्यटकीय गन्तव्यको रूपमा विकास गर्न पूर्व सहपाठीहरूले पहल थालेका छन्। मन्दिर क्षेत्रको विकासका लागि होमस्टे, साइकल अभियान र खेलकुद आयोजनाका योजनासहित दीर्घकालीन गुरुयोजना कार्यान्वयन गर्ने सहमति भएको छ। स्थानीय सरकार र बासिन्दाको साझेदारीमा एक करोड १८ लाख रुपैयाँ लागतमा मन्दिरको पुनर्निर्माण सम्पन्न भइसकेको छ। ८ साउन, स्याङ्जा।
गाउँका पूर्व सहपाठीहरू एकजुट भएर बहाकोट कालिका मन्दिरलाई धार्मिक तथा पर्यटकीय गन्तव्यका रूपमा विकास गर्ने योजनामा लागेका छन्। बहाकोटमा जन्मिएर अहिले देश तथा विदेशमा रहेका पूर्व विद्यार्थीहरूले स्थानीयबासीसँग अन्तरक्रिया गरी मन्दिर संरक्षण, पर्यटन प्रवर्द्धन र क्षेत्रको दीर्घकालीन विकासका योजनाबारे छलफल गरेका छन्।
छलफलपछि दीर्घकालीन विकास योजनालाई चरणबद्ध रुपमा कार्यान्वयन गर्ने सहमति भएको कार्यक्रम संयोजक सुवेदार इन्द्रबहादुर थापाले बताए। उनका अनुसार २०७२ सालको भूकम्पबाट क्षतिग्रस्त भएको कालिका मन्दिर पुनर्निर्माण भइसकेपछि अब यसलाई धार्मिक पर्यटनसँग जोड्दै बहाकोट क्षेत्रको समग्र विकासमा केन्द्रित गरिएको छ।
सुवेदार मेजर सूर्यबहादुर थापाले मन्दिर पुनर्निर्माण पश्चात् आन्तरिक तथा बाह्य पर्यटकहरूको आगमन बढिरहेको उल्लेख गर्दै अब आवश्यक पूर्वाधार, व्यवस्थापन र सेवा–सुविधा विस्तारमा ध्यान दिनुपर्ने बताए। चण्डीकालिका आमा समूहकी मीरा दर्लामी मगरले तय भएका योजनाले बहाकोटलाई धार्मिक तथा पर्यटकीय गन्तव्यका रूपमा स्थापना गर्न सहयोग पुग्ने विश्वास व्यक्त गरिन्।
अर्वाखोला, अरौदी खोला र बूढोखोलाको बीचमा रहेको पहाडी डाँडामा अवस्थित बहाकोट कालिका मन्दिर प्रदेश सरकार, पुतलीबजार नगरपालिका र स्थानीयवासीको साझेदारीमा एक करोड १८ लाख रुपैयाँ लागतमा पुनर्निर्माण गरिएको हो। पुनर्निर्माण काम २०८० साल असोज महिनामा सम्पन्न भएको थियो। मन्दिरका पूजारी उदयराज मरासिनीका अनुसार यहाँ चैते दशैंको अष्टमी र बडा दशैंको महानवमीमा विशेष पूजा हुँदै आएको छ भने वर्षभर नियमित पूजा सञ्चालन भइरहेका छन्।
