इटालीले नर्थन आयरल्याण्डलाई २-० ले पराजित गर्दै फिफा विश्वकप प्लेअफ पाथ ‘ए’ को फाइनलमा पुग्न सफल भएको छ। सान्द्रो टोनालीले ५६ औं मिनेटमा र मोइसे किनले ८० औं मिनेटमा गोल गर्दै इटालीको जीत सुरक्षित गरे। अब इटाली बोस्निया–हर्जेगोभिनासँग फाइनल खेल्नेछ, जहाँ विजेताले विश्वकपको समूह ‘बी’ मा स्थान पाउनेछ। १३ चैत, काठमाडौं।
चार पटकको विश्वकप विजेता इटाली फिफा विश्वकपमा अर्को महत्वपूर्ण कदम बढाएको छ। गएराति सम्पन्न प्लेअफ पाथ ‘ए’ को सेमिफाइनलमा नर्थन आयरल्याण्डमाथि महत्वपूर्ण जित हात पारी इटालीले फाइनलमा प्रवेश गरेको हो। बर्गामोमा सम्पन्न खेल निकै प्रतिस्पर्धात्मक रह्यो, जसमा पहिलो हाफ गोलरहित बराबरीमा सकियो। तर, दोस्रो हाफमा इटालीले प्रभावशाली प्रदर्शन गर्दै सहज जित सुनिश्चित गर्यो।
खेलको ५६ औं मिनेटमा मिडफिल्डर सान्द्रो टोनालीले बक्स बाहिरबाट शक्तिशाली प्रहार गर्दै इटालीलाई अग्रता दिलाए। त्यसपछि ८० औं मिनेटमा मोइसे किन्ले अर्को गोल थप्दै जीत पक्का गरे। पहिलो हाफमा इटालीले केही दबाब महसुस गरेको थियो। युवा खेलाडीहरूले भरिपूर्ण नर्थन आयरल्याण्डले राम्रो चुनौती दिँदा पनि गोल गर्ने अवसर सदुपयोग गर्न सकेन। अब इटालीले फाइनलमा बोस्निया–हर्जेगोभिनासँग प्रतिस्पर्धा गर्नेछ। विजेताले विश्वकप समूह ‘बी’ मा ठाउँ बनाउनेछ, जहाँ क्यानडा, स्वीट्जरल्याण्ड र कतार रहेका छन्। इटालीको लागि यो जीत अत्यन्त महत्वपूर्ण छ, किनभने उनीहरू लगातार तेस्रो पटक विश्वकपबाट बाहिरिन सक्ने जोखिममा थिए। बोस्नियाले पनि सेमिफाइनलमा वेल्सलाई पेनाल्टी सुटआउटमा ४-२ ले पराजित गर्दै फाइनल स्थान सुरक्षित गरेको छ।
