१४ चैत्र काठमाडौं । अमेरिकी प्रतिनिधिसभाका रिपब्लिकनहरूले संयुक्त सहमतिमा बनाएको द्विदलीय सम्झौताहारेपछि ‘डिपार्टमेन्ट अफ होमल्यान्ड सेक्युरिटी’ (डीएचएस) को आंशिक रुपमा ‘शटडाउन’ बढ्दो छ। सिनेटले अध्यागमन निकायहरूको बजेट कटौती गरि अन्य सुरक्षा निकायहरूलाई खोल्ने प्रस्ताव पारित गरे पनि सभामुख माइक जोन्सनले उक्त प्रस्तावलाई ‘मजाक’ भन्दै खारेज गरिदिएका छन्। राजनीतिक द्वन्द्वका कारण अमेरिकाभरि विमानस्थलमा सुरक्षा चेकका लागि यात्रुहरूले घण्टौं पर्खनुपर्ने स्थिति बनेको छ।
प्रतिनिधिसभाले शुक्रबार राति २१३ विरुद्ध २०३ मतले आफ्नै नयाँ प्रस्ताव पारित गरेको छ, जसले अध्यागमन र भन्सार प्रवर्तन (आइसीई) का लागि ६० दिनसम्म निरन्तर बजेट सुनिश्चित गर्छ। तर, सिनेटका बहुमत नेता चक सुमरले त्यसलाई सिनेटमा पुग्नासाथ ‘मृत’ घोषणा गरिसकेका छन्। डेमोक्रेटहरूले आइसीई एजेन्टहरूले मिन्नेसोटामा अमेरिकी नागरिक रेनी गुड र एलेक्स प्रेटीको हत्या गरेको घटनाका कारण उक्त निकायको बजेटमा कडाइ गर्ने माग गरेका छन्। उनीहरूले एजेन्टहरूले मास्क नलगाउन पाउने, जातीय प्रोफाइलिङ नगर्ने र निजी सम्पत्तिमा प्रवेश गर्न न्यायिक वारन्ट अनिवार्य गर्ने माग गरेका छन्।
यसैबिच, संसद दुई हप्ताको विदामा गएपछि करिब ५० हजार टिएसए एजेन्टहरू डेढ महिनादेखि तलब पाउन सकेका छैनन्। ह्युस्टन विमानस्थलका उड्डयन निर्देशक जिम स्जेसियाकका अनुसार हाल आधाभन्दा कम मात्र सुरक्षा जाँच केन्द्र सञ्चालनमा छन्। वृद्धि हुँदै गएको संकटका बीच राष्ट्रपति डोनाल्ड ट्रम्पले कार्यकारी आदेश जारी गर्दै टिएसए एजेन्टलाई आगामी सोमबारदेखि तलब दिन निर्देशन दिएका छन्। तर, बजेट स्वीकृत गर्ने संवैधानिक अधिकार संसदसँग मात्र रहेकोले ट्रम्पको यो कदमले कानुनी चुनौती सामना गर्न सक्छ।
