सरकारले शनिबार र आइतबार गरी सातामा दुई दिन सरकारी कार्य दिवस नहुने निर्णय गरेको छ। आइतबार बसेको मन्त्रिपरिषद् बैठकले सरकारी कार्यालय र शैक्षिक संस्थाहरूमा साताको दुई दिन बिदा दिने निर्णय गरेको जानकारी सरकारका प्रवक्ता तथा शिक्षामन्त्री सस्मित पोखरेलले दिएका छन्। यसैगरी, सरकारले सरकारी कार्यालयहरूको कार्यालय समय बिहान ९ बजेदेखि साँझ ५ बजेसम्म कायम गर्ने निर्णय पनि गरेको छ।
इरानमा जारी युद्धका कारण इन्धन आपूर्तिमा समस्या देखिन थालेपछि धेरै देशहरूले इन्धन खपत घटाउन बिदासम्बन्धी अन्य उपायहरू गर्दै आएका छन्। पोखरेलका अनुसार, “पेट्रोलियम आपूर्तिमा उत्पन्न समस्याका कारण चैत २३ गतेदेखि लागू हुने गरी सरकारी कार्यालय र शैक्षिक संस्थाहरूमा शनिबार र आइतबार बिदा दिने निर्णय गरिएको छ।”
सरकारले डिजेल र पेट्रोलबाट सञ्चालित सवारीसाधनहरूलाई विद्युतीय सवारीसाधनमा रूपान्तरण गर्न आवश्यक कानुनी व्यवस्था मिलाउने पनि निर्णय गरेको छ। धेरै देशहरूमा दुई दिन बिदा दिने प्रचलन रहेको र यसले इन्धन खपतलाई कम गर्ने अपेक्षा गरिएको छ।
नेपालमा यसअघि पनि दुई पटक सातामा दुई दिन बिदा दिने अभ्यास गरिएको थियो। तर दुवै पटक निर्णय परिवर्तन गरी शनिबार मात्र एक दिन बिदा दिइने व्यवस्था कायम गरिएको थियो। यसअघि शेरबहादुर देउवा नेतृत्वको सरकारले परीक्षणका रूपमा दुई दिन बिदा दिने निर्णय गरेको थियो। २०७९ जेठ १ गतेदेखि लागू हुने गरी कार्यालय समय बिहान ९:३० बजेदेखि साँझ ५:३० बजेसम्म कायम गर्ने र शनिबार र आइतबार दुई दिन बिदा दिने निर्णय गरिएको थियो। तर एक महिनापछि असार १ गतेदेखि आइतबारको बिदा खारेज गरी सातामा ६ दिन कार्यालय सञ्चालन गर्ने निर्णय गरियो।
