कांग्रेस संसदीय दलको नेतामा प्रतिनिधि सभाका वरिष्ठ सदस्य अर्जुननरसिंह केसी, भीष्मराज आङ्देम्बे, मोहन आचार्य, भरतबहादुर खड्का र निस्कल राईसम्मको नामहरू चर्चामा छन्। नेपाली कांग्रेस संसदीय दलको बैठक आज बिहान ११ बजेदेखि सिंहदरवारमा बस्दैछ र संसदीय दलको नेता चयनसम्बन्धी विषयमा छलफल गरिनेछ। कांग्रेस संसदीय दलको विधानअनुसार प्रतिनिधिसभाका सदस्यहरूले आफ्नै सदस्यबाट दलको नेता निर्बाचित गर्नेछन् र एकभन्दा बढी उम्मेदवार भएमा गोप्य मतदान स्वरूप निर्वाचन गरिने व्यवस्था छ।
संसदीय दलको नेता चयन प्रक्रियामा गगन थापा र शेरबहादुर देउवा पक्षका कारण यसपटक पनि मतदान प्रक्रिया अपनाउने सम्भावना उच्च रहेको कांग्रेस नेताहरूले बताएका छन्। नेपाली कांग्रेसकी सांसद बासना थापाले बैठकको एजेन्डा आधिकारिक रूपमा तय नभए पनि संसदीय दलको नेता चयन विषयमा छलफल हुनसक्ने जानकारी दिइन्। उनले भनिन्, ‘संसदीय दलको बैठकको एजेन्डा आधिकारिक नभए तापनि दलको नेता चयन गर्नुपर्ने अवस्था आउन सक्छ।’
कांग्रेस संसदीय दलको नेताको रूपमा प्रतिनिधि सभाका ज्येष्ठ सदस्य अर्जुननरसिंह केसी, भीष्मराज आङ्देम्बे, मोहन आचार्य, भरतबहादुर खड्का र निस्कल राईको नाम चर्चामा छ। सभामुख चयन नभएसम्म ज्येष्ठ सदस्य केसीले संसदको बैठक संचालन गर्ने भएपछि कांग्रेसले दलको नेता चयन ढिलो गर्ने तयारी गरेको बताइएको छ।
अन्य दलहरूले पहिल्यै संसदीय दलका नेता चयन गरिसकेका छन्। राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र शाह (बालेन) संसदीय दलको नेता चयन भई प्रधानमन्त्री भइसकेका छन्। नेकपा एमालेले रामबहादुर थापालाई, नेपाली कम्युनिस्ट पार्टीले पुष्पकमल दाहाल प्रचण्डलाई, श्रम संस्कृति पार्टीका अध्यक्ष हर्क साम्पाङलाई र राष्ट्रिय प्रजातन्त्र पार्टी (राप्रपा)ले ज्ञानेन्द्र शाहीलाई दलको नेता चयन गराइसकेका छन्।
