२८ चैत, धनगढी। निर्माण व्यवसायी संघ कैलालीले इन्धनजन्य सामग्री र निर्माण सामग्रीमा भइरहेको अत्यधिक मूल्य वृद्धिका कारण निर्माण उद्योग ठप्प हुने अवस्थामा पुगेको भन्दै सरकारले उद्योगमा ‘आपतकाल’ घोषणा गर्न माग गरेको छ। संघले शनिबार धनगढीमा पत्रकार सम्मेलन गर्दै मध्यपूर्वमा जारी युद्धले डिजेल, पेट्रोल, मट्टितेल लगायत इन्धनजन्य सामग्रीमा पटक-पटक अप्रत्याशित मूल्य वृद्धिले निर्माण क्षेत्र गम्भीर संकटमा परेको जनाएको छ।
संघका अध्यक्ष टेकबहादुर मल्लले इन्धनसँगै बिटुमिन, सिमेन्ट, डण्डी लगायत निर्माण कार्यमा व्यापक प्रयोग हुने सामग्रीमा पनि निरन्तर मूल्य वृद्धि भइरहेको र बजारमा अभाव देखा परेको कारण निर्माण उद्योग ठप्प हुने स्थितिमा पुगेको बताए। पत्रकार सम्मेलनमा संघले क्रसर उद्योगमा देखिएको समस्याले पनि निर्माण क्षेत्र थप प्रभावित भएको उल्लेख गरेको छ। नेपाल निर्माण व्यवसायी महासंघले पटक-पटक सरकार तथा सम्बन्धित निकायको ध्यानाकर्षण गराए पनि हालसम्म समस्या समाधान गरिने कुनै ठोस निर्णय नभएको संघको भनाइ छ।
निर्माण व्यवसायी महासंघका केन्द्रीय उपाध्यक्ष (सुदूरपश्चिम भूगोल) प्रकाश सेठीले निर्माण कार्यको मूल्य समायोजन राष्ट्र बैंकको मूल्य सूचकांक अनुसार हुने व्यवस्था भएपनि बजारमा निर्माण सामग्रीको मूल्य अत्यधिक बढ्दा सूचकांकमा घटेको देखिनुले व्यवसायीहरूलाई थप मार परेको बताए। उनले निर्माण व्यवसायीहरूले भोग्नुपर्ने समस्या समाधानका लागि सरकारले अग्रसर हुनुपर्ने स्पष्ट पारे। संघले निर्माण कार्य तीव्र हुने समयमा इन्धन र निर्माण सामग्रीको मूल्य वृद्धिका कारण व्यवसायीहरूमा ठूलो आर्थिक भार परेको उल्लेख गर्दै निर्माण उद्योगमा तत्काल ‘आपतकाल’ घोषणा गरी राहत उपलब्ध गराउन सरकारसँग जोरदार माग गरेको छ। साथै, प्रत्येक आयोजनामा वास्तविक मूल्य वृद्धिअनुसार कानुनी व्यवस्थाबाट मूल्य समायोजन हुन नसक्ने भएकाले मूल्य समायोजन मार्गदर्शिका–२ तत्काल जारी गर्न र सबै अवधिका ठेक्कामा मूल्य समायोजनको व्यवस्था लागू गर्न सरकारसमक्ष अपिल पनि गरेको छ।
