अमेरिका र इरानबीचको वार्ता गर्न इस्लामाबाद उच्च सुरक्षा व्यवस्था सहित तयार

२८ चैत, काठमाडौं । अमेरिका र इरानका प्रतिनिधिमण्डलबीच हुने उच्चस्तरीय वार्ताका लागि पाकिस्तानले सुरक्षा र व्यवस्थापन पुस्तिकालाई बलियो बनाएको छ। पाकिस्तानका गृहमन्त्री मोहसिन नाक्वीले विदेशी प्रतिनिधिहरूको पूर्ण सुरक्षाका लागि व्यापक योजना तयार गरिएको बताएका छन्। इस्लामाबादका अधिकारीहरूले वार्ताको पूर्वसन्ध्यामा सुरक्षा कदमहरू कडा बनाएका छन्। व्यवस्थापनलाई सहज बनाउन इस्लामाबाद र रावलपिन्डीमा स्थानीय बिदा घोषणा गरिएको छ।

‘ब्लू बुक’ भीभीआईपी प्रोटोकलअन्तर्गत प्रहरी, अर्धसैनिक बल र अन्य सुरक्षा निकाय परिचालन गरिएको छ। सिन्ह्वाका अनुसार विदेशी प्रतिनिधिमण्डलको आवागमनका लागि फरक-फरक रुटहरू निर्धारण गरिएको छ। इस्लामाबाद प्रहरीले एक्सप्रेस वेमा ट्राफिक मोडिने जानकारी दिँदै ट्राफिक एडभाइजरी जारी गरेको छ। पाकिस्तानले वार्तालाई दृष्टिगत गरी उद्दार सेवा र अस्पतालहरूलाई उच्च सतर्कतामा राखेको छ। रेड जोनमा रहेको पाँचतारे होटल सेरेना प्रतिनिधिमण्डलका लागि पूर्णरूपमा आरक्षित गरिएको छ।

इरानी र अमेरिकी प्रतिनिधिमण्डलको बसाइका क्रममा राजधानी प्रवेश गर्ने धेरै नाकाहरू बन्द गरिनेछन्। दुवै पक्षलाई वार्ताको मेजमा ल्याउन पाकिस्तानका प्रधानमन्त्री शहबाज शरीफ र उपप्रधानमंत्री तथा विदेश मन्त्री मोहम्मद इसाक दारले क्षेत्रीय नेताहरूसँग परामर्श गरेका छन् र तेहरान तथा वाशिङटनसँग कूटनीतिक सम्पर्क स्थापित गरेका छन्। पुराना सम्बन्ध र पाकिस्तानको तटस्थताले संवादलाई अघि बढाउन महत्वपूर्ण भूमिका खेल्ने विश्लेषकहरूले बताएका छन्। इरानको वार्ता टोली इस्लामाबाद पुगेको छ भने अमेरिकी टोली पनि इस्लामाबाद पुग्न लागेको छ। अमेरिकी टोलीको नेतृत्व उपराष्ट्रपति जेडी भान्सले गर्दैछन् भने इरानको टोलीको नेतृत्व सभामुख मोहम्मद बगर गालिबाफले गर्दैछन्।