स्वास्थ्य मन्त्रालयले देशभरका अस्पतालहरूमा उपलब्ध १० प्रतिशत निःशुल्क शय्याको विवरण सार्वजनिक गर्नका लागि ‘फ्रि हेल्थ पोर्टल’ संचालनमा ल्याएको छ। अहिलेसम्म २३ अस्पतालले पोर्टलमा उपलब्ध ५३२५ शय्यमध्ये ६२१ शय्या निःशुल्क छुट्याएको देखाइएको छ, जुनमध्ये एउटा मात्र शय्या प्रयोगमा छ। निजी अस्पतालहरूले स्पष्ट मापदण्ड नहुँदा १० प्रतिशत निःशुल्क शय्या कार्यान्वयन गर्न कठिनाइ रहेको बताएका छन्। ३ वैशाख, काठमाडौं।
विपन्न, असहाय तथा बेवारिसे बिरामीहरूको लागि अस्पतालहरूले छुट्याउनुपर्ने १० प्रतिशत निःशुल्क शय्याको विवरण अनलाइन प्रणालीमार्फत सार्वजनिक हुन थालेको छ। स्वास्थ्य तथा जनसंख्या मन्त्रालयले ‘फ्रि हेल्थ पोर्टल’ संचालन गरी देशभरका अस्पतालहरूमा उपलब्ध निःशुल्क शय्या, ती शय्यामा उपचाररत बिरामीहरूको विवरण रियल टाइममै हेर्न सकिने व्यवस्था मिलाएको छ। मन्त्रालयका सहप्रवक्ता डा. समीर अधिकारीका अनुसार उक्त पोर्टलबाट अस्पतालमा कति निःशुल्क शय्या उपलब्ध छन्, ती शय्यामा को–कोले उपचार ग्रहण गरिरहेका छन् र कति शय्या खाली छन् भन्ने जानकारी सजिलै पत्ता लगाउन सकिन्छ।
मन्त्रालयका अनुसार कानुनी व्यवस्थालाई प्रभावकारी रूपमा लागू गर्न र अस्पतालहरूमा उपलब्ध निःशुल्क सेवाको वास्तविक स्थिति सार्वजनिक गर्न ‘फ्रि हेल्थ पोर्टल’ सञ्चालनमा ल्याइएको हो। मन्त्रालयले दिएको तथ्यांक अनुसार संघ, प्रदेश र स्थानीय स्वास्थ्य संस्थाका जम्मा झण्डै ७ हजार शय्याबाट विपन्न र असहाय नागरिकले निःशुल्क सेवा पाउने छन्। डा. अधिकारीका अनुसार निःशुल्क उपचार सेवा लिन इच्छुक विपन्न बिरामीहरू अस्पतालको सामाजिक सेवा इकाइबाट सेवा लिन सक्नेछन्।
निजी अस्पतालहरूको छातो संस्था एसोसिएसन अफ प्राइभेट हेल्थ इन्स्टिच्युसन अफ नेपाल (अफिन) का अध्यक्ष डा. पदम खड्काले १० प्रतिशत शय्या निःशुल्क उपलब्ध गराउने विषयमा स्पष्ट मापदण्ड विना कार्यान्वयन गर्न नसकिने बताएका छन्। उनले भने, ‘राज्यले कसरी लागू गर्ने, खर्च कसरी व्यवस्थापन गर्ने र कुन सेवा निःशुल्क हुने भन्ने स्पष्ट नीति ल्याएपछि मात्र व्यावहारिक रूपमा कार्यान्वयन सम्भव छ।’
