५ वैशाख, म्याग्दी । स्थानीयवासीहरूले श्रमदानमार्फत म्याग्दीको अन्नपूर्ण गाउँपालिका–६ मा रहेको पर्यटकीय स्थल घोडेपानी जोड्ने सडकको लुलियाघुम्ती खण्ड मर्मत गरी सहज यातायात सञ्चालनको व्यवस्था मिलाएका छन्। पोखरेबगर–घोडेपानी सडकको लुलियाघुम्ती क्षेत्रमा दुर्घटना बढ्न थालेपछि स्थानियहरूले श्रमदानमार्फत मर्मत कार्य गरेका हुन्। पोखरेबगर, कुरमुनी, हल्लेखर्क, बिरौटा, भुवानीथान र घारगाउँका ८० जनाले दुई दिन श्रमदान गरेर मर्मत गरेका छन् भने पोखरेबगर युवा क्लबका अध्यक्ष रामकृष्ण खड्काले जानकारी दिएका छन्।
अन्नपूर्ण गाउँपालिकाले उपलब्ध गराएको जाली भरेर १३ घनमिटर पर्खाल निर्माण र उकालो घुम्तीमा करिब ३० मिटर दूरीमा ढुङ्गा बिछाइएको छ। मर्मतपछि सडकमा सहज रूपमा सवारीसाधन सञ्चालन हुन थालेको उनले बताएका छन्। अन्नपूर्ण गाउँपालिका–६ का वडाध्यक्ष रामबहादुर खड्का, स्थानीय राजाराम बरुवाल, बिपिन बरुवाल र रामकृष्ण खड्काको समन्वयमा यसै हप्ता सडक मर्मतका लागि श्रमदान अभियान सञ्चालन गरिएको थियो। सडक मर्मतका क्रममा ढुङ्गा ढुवानी, खाजा, डोजर परिचालनका लागि मुक्तिनाथ केबलकार प्रालिबाट ५० हजार रुपैयाँ नगद तथा अन्य दाताहरूबाट सामग्री सहयोग प्राप्त भएको छ।
लुलियाघुम्ती र हल्लेखर्क पहिरो क्षेत्रमा सडकको जीर्ण अवस्थामा स्थानीयवासी र पर्यटकहरूलाई समस्या हुँदै आएको थियो। स्थानीय उद्यमी शिव खड्काका अनुसार पहिरोका कारण साँघुरिएको सडक, ग्रेड र मोड मिल्न नसक्ने अवस्थाले सवारीसाधन उक्लिन कठिन बनाएको थियो, बीचमा अड्किने र दुर्घटना हुने समस्या बढेको थियो। संघीय सरकारले बजेट विनियोजन गरेको योजना कार्यान्वयनमा ढिलाइ भएपछि जोखिम बढेपछि समुदायस्तरमा श्रमदान गरेर अस्थायी रूपमा मर्मत थालिएको वडाध्यक्ष रामबहादुर खड्काले बताए। ‘लुलियाघुम्ती, हल्लेखर्क सडक सुधारका लागि स्थानीय पूर्वाधार विकास कार्यालय पोखराले ढिलाइ गर्दा दुर्घटनाको जोखिम र सास्ती बढेको छ’, उनले भने, ‘जनप्रतिनिधिबाट निरन्तर आग्रहपछि कार्यालयले बिहीबार मात्रै तीन करोड रुपैयाँ बजेट विनियोजन गरी आयोजनाको ठेक्का आह्वान गरेको छ।’
