वीरगञ्जको मुख्य बजार क्षेत्रमा सडक विस्तार गर्दा आज बिहान ५ बजेदेखि दिउँसो ४:३० बजेसम्म विद्युत् र इन्टरनेट सेवा अवरुद्ध भएको छ। नेपाल विद्युत् प्राधिकरण वीरगञ्ज वितरण केन्द्रका प्रमुख विजय महतोले वैशाख ८ गतेसम्म विद्युत् आपूर्ति अनियमित हुन सक्ने जानकारी दिएका छन्। स्थानीय व्यापारी परशुराम कलवारले सडक विस्तारका क्रममा तयारी नहुँदा विद्युत् र इन्टरनेट सेवा प्रभावित भई जनजीवनमा समस्या आएको बताएका छन्।
सडक विभाग हेटौँडाले आज बिहानदेखि वीरगञ्जको मुख्य सडकमा अतिक्रमण गरेर निर्माण गरिएका घरहरूलाई डोजर र एक्साभेटर प्रयोग गरी भत्काउन थालेपछि यहाँको विद्युत् र इन्टरनेट सेवा प्रभावित भएको हो। विद्युत् र इन्टरनेट सेवा अवरुद्ध हुँदा दैनिक कामकाजमा समस्या हुनुका साथै जनजीवन प्रभावित भएको छ। वीरगञ्जको गण्डकचोकबाट मितेरीपुलसम्मको क्षेत्रमा बिहान ५:०० बजेदेखि दिउँसो ४:३० बजेसम्म विद्युत् तथा इन्टरनेट सेवा अवरुद्ध रहेको छ।
वीरगञ्ज महानगर-६ का स्थानीय व्यापारी परशुराम कलवारले सडक विस्तारको क्रममा विद्युत् र इन्टरनेट सेवा प्रभावित भएको बताएका छन्। उनले भने, ‘आज बिहानदेखि नै विद्युत् र इन्टरनेट सेवा अवरुद्ध हुँदा जनजीवन प्रभावित भएको छ। स्थानीय प्रशासनले आवश्यक तयारी नगरी सडक विस्तार गर्दा गर्मीयाममा सर्वसाधारणका लागि समस्या आएको छ। बिजुली नहुँदा मोटर पनि चल्दैन, बोरिङबाट पानी निकाल्न सकिँदैन, जसका कारण शौचालय चलाउन आवश्यक पानीको समस्या देखिएको छ।’
नेपाल विद्युत् प्राधिकरण वीरगञ्ज वितरण केन्द्रका प्रमुख विजय महतोले मितेरीपुलदेखि गण्डक नहर सडक विस्तार गरिने क्रममा विद्युत् आपूर्ति नियमित रूपमा हुन नसक्ने जानकारी दिएका छन्। उनले भने, ‘आजदेखि वैशाख ८ गतेसम्म विद्युत् आपूर्ति अनियमित हुन सक्ने अनुमान छ। काबुल बाहिरका मर्मत सुधार कार्यहरू लामो समय लाग्ने देखिएपछि बिहानैदेखि मर्मत कार्य जारी छ।’ उनले विद्युत् सेवा प्रभावित हुने भएकाले आवश्यक धैर्यता अपनाउन आम जनता र सम्बन्धित पक्षहरूलाई आग्रह गरेका छन्।
