स्विट्जरल्याण्डको युनिभर्सिटी अफ लाजेनका अनुसन्धानकर्ताहरूले भिटामिन बी ७ को अभावले क्यान्सर कोषहरूको ऊर्जा प्राप्त गर्ने वैकल्पिक मार्ग अवरुद्ध गराउने पत्ता लगाएका छन्। उक्त अध्ययनले क्यान्सर कोषहरूको ‘मेटाबोलिक’ लचिलोपनलाई निस्तेज बनाउन सकिने नयाँ तथ्य ‘मोलिक्युलर सेल’ जर्नलमा प्रकाशित भएको छ। ‘एफबीएक्सडब्ल्यू७’ जीनमा समस्याले गर्दा क्यान्सर कोषहरू केवल ग्लुटामाइनमा निर्भर हुन्छन् र ग्लुटामाइन रोक्ने औषधिहरू प्रभावकारी हुन सक्ने देखिएको छ। ७ वैशाख, काठमाडौं।
क्यान्सर उपचारमा वैज्ञानिकहरूले एउटा नयाँ र महत्वपूर्ण सफलता हासिल गरेका छन्। स्विट्जरल्याण्डको युनिभर्सिटी अफ लाजेनका अनुसन्धानकर्ताहरूको अनुसार भिटामिन बी ७ (बायोटिन) को अभावले क्यान्सर कोषहरूले वैकल्पिक रूपमा ऊर्जा प्राप्त गर्ने मार्ग बन्द गरिदिएर उनीहरूको वृद्धिलाई रोक्न सक्छ। ‘मोलिक्युलर सेल’ जर्नलमा प्रकाशित यस अध्ययनले क्यान्सर कोषहरूको मेटाबोलिक लचिलोपन कसरी न्यून गर्न सकिन्छ भन्ने नयाँ तथ्य सार्वजनिक गरेको हो।
सामान्यतया धेरै क्यान्सर कोषहरू ‘ग्लुटामाइन’ नामक एमिनो एसिडमा निर्भर हुन्छन्, जसलाई वैज्ञानिकहरूले ‘ग्लुटामाइन एडिक्सन’ भन्छन्। जब क्यान्सर उपचारका क्रममा ग्लुटामाइन आपूर्ति रोकिन्छ, तब धेरै क्यान्सर कोषहरूले पाइरुभेटजस्ता अन्य पोषक तत्वलाई इन्धनका रूपमा उपयोग गरेर बाँच्न र बढ्न सक्ने गर्छन्। तर, यस वैकल्पिक मार्गको लागि कोषहरूलाई ‘पाइरुभेट कार्बोक्सिलेज’ इन्जाइम सक्रिय गर्न जरूरी हुन्छ, जसको सक्रियताका लागि भिटामिन बी ७ अनिवार्य हुन्छ।
अनुसन्धान अनुसार भिटामिन बी ७ को अभावमा उक्त इन्जाइमको काम बन्द हुन्छ र क्यान्सर कोषहरूले वैकल्पिक ऊर्जा स्रोत प्राप्त गर्न नसकेर मर्न पुग्छन्। यसले क्यान्सरसँग सम्बन्धित ‘एफबीएक्सडब्ल्यू७’ नामक विशेष जीनको भूमिकालाई पनि स्पष्ट पारेको छ। धेरै क्यान्सर रोगीहरूमा यो जीनमा उत्परिवर्तन पाइन्छ। अध्ययनले देखाएको छ कि यस जीनमा खराबी हुँदा पाइरुभेट इन्जाइमको मात्रा कम हुन्छ, जसका कारण क्यान्सर कोषहरू पूर्ण रूपमा ग्लुटामाइनमा निर्भर हुन्छन्। यस्तो अवस्थामा ग्लुटामाइन रोक्ने औषधिहरू बढी प्रभावकारी हुने सम्भावना छ। उक्त खोजले किन कतिपय अवस्थामा क्यान्सरका औषधिहरूले प्रभाव नदेखाउने प्रश्नको मात्र उत्तर दिएको छैन, साथै भविष्यमा मेटाबोलिक कमजोरीमा केन्द्रित गरेर नयाँ र प्रभावकारी उपचारहरू विकास गर्ने बाटो पनि खोलिदिएको छ।
