चालु आर्थिक वर्ष २०८२/८३ को तेस्रो त्रैमासिक अवधिमा नेपालले २ खर्ब रुपैयाँभन्दा बढी निर्यात गरेको छ, जुन विगत वर्षको तुलनामा १८.४६ प्रतिशतले वृद्धि हो। नेपालको नौ महिनाको कुल आयात १४ खर्ब ९० अर्ब रुपैयाँ पुगेको छ, जसमा पेट्रोलियम पदार्थ सबैभन्दा बढी २ खर्ब ५० अर्ब रुपैयाँ बराबर आयात गरिएको छ। वैदेशिक व्यापार घाटा १२ खर्ब ६७ अर्ब रुपैयाँ पुगेको छ भने आयात/निर्यात अनुपात ६.६९ रहेको छ। भारत र चीन मुख्य व्यापारिक साझेदार हुन्।
७ वैशाख, काठमाडौं। चालु आर्थिक वर्ष २०८२/८३ को तेस्रो त्रैमास (साउन-चैत)भित्र मात्रै निर्यात व्यापार २ खर्ब रुपैयाँ भन्दा माथि पुगेको छ। यो आँकडा गत वर्ष सोही अवधिको तुलनामा १८.४६ प्रतिशतले बढेको हो। भन्सार विभागका अनुसार अघिल्लो आव चैतसम्मको वस्तु निर्यात १ खर्ब ८८ अर्ब १९ करोड रुपैयाँ बराबर थियो। गत आवमा निर्यात व्यापारले नयाँ कीर्तिमान स्थापना गरेको थियो। त्यो वर्ष कुल निर्यात २ खर्ब ७७ अर्ब ३ करोड रुपैयाँ थियो।
यस वर्ष वनस्पति तथा जनावरको घिउतेल निर्यातमा उल्लेखनीय वृद्धि हुँदा समग्र निर्यात व्यापारमा तीव्रता आएको देखिन्छ। यस्ता वस्तुहरू नेपालले तेस्रो मुलुकबाट आयात गरी भारततर्फ निर्यात गर्दै आएको छ। ९ महिनामा १ खर्ब ५ अर्ब रुपैयाँभन्दा बढी घिउतेल निर्यात भएको छ। त्यस्तै मसला, कफी, चिया १४ अर्ब ९८ करोड रुपैयाँभन्दा माथिको निर्यात छ। नेपालको प्रतिस्पर्धात्मक क्षमता कम भएका वस्तुको तुलनामा आयातमा आधारित वस्तुहरूको उच्च वृद्धिका कारण हालको निर्यात प्रवृत्तिको दिगोपनमा भने प्रश्न उठ्न सक्छ।
