नेपाली कांग्रेसका निवर्तमान कार्यवाहक सभापति पूर्णबहादुर खड्काले १५ वैशाखका लागि समूहको भेला डाकेका छन्। यो भेला धुम्बाराहीस्थित होटल स्मार्टमा १४ औं महाधिवेशनबाट निर्वाचित पदाधिकारी, केन्द्रीय सदस्य, जिल्ला सभापतिहरू र क्षेत्रीय सभापतिहरूका लागि आयोजना गरिएको हो। सर्वोच्च अदालतले पार्टीको आधिकारिकतासम्बन्धी रिट खारेज गरेपछि खड्काले ६ वैशाखमा निवर्तमान केन्द्रीय सदस्यहरूसँग बैठक गरेका थिए।
खड्काले १५ वैशाखका लागि बोलाएको भेलाबारे एक नेता खड्कानिकट केन्द्रीय सदस्यले जानकारी दिएका छन्। खड्काको सचिवालयले पनि समूहको भेला बोलाएको पुष्टि गरेको छ। सचिवालयका अनुसार ६ वैशाखको बैठकपछि खड्काले यो भेला आयोजना गर्नुभएको हो।
यसअघि, खड्काले गल्फुटारस्थित निवासमा शीर्ष नेताहरूसँग छलफल गरेका थिए। ६ वैशाखमै सभापति गगन थापाले नेता खड्कालाई भेट्न गल्फुटार पुगेका थिए। दुई नेताबीच भएको छलफलबारे अहिलेसम्म कुनै जानकारी सार्वजनिक गरिएको छैन। कांग्रेस महामन्त्री गुरूराज घिमिरेका अनुसार सभापति थापा र खड्काबीच शिष्टाचार भेटघाट भएको हो। ‘त्यो केवल एउटा शिष्टाचार भेटकै तहमा सीमित रह्यो,’ उनले भने।
