नेपाल कबड्डी लिग (एनकेएल) सिजन २ का लागि ६ शहरका ६ टिमले आइतबार ८४ खेलाडी ड्राफ्टमार्फत् चयन गरेका छन्, जसमा ५४ नेपाली र ३० विदेशी खेलाडी रहेका छन्। एनकेएल सिजन २ जेठ २२ देखि दशरथ रंगशालास्थित राखेप कभर्डहल, त्रिपुरेश्वरमा विराटनगर बाहुबली, जनकपुर नाइट्स, काठमाडौं माभरिक्स, पोखरा लेकर्स, बुटवल बुल्स र धनगढी वाइल्डक्याट्सले प्रतिस्पर्धा गर्नेछन्।
आइतबार लाजिम्पाटमा आयोजित प्लेयर्स ड्राफ्टमा छनोट गरिएका १४२ जना नेपाली खेलाडीलाई तीन क्याटगोरीमा वर्गीकरण गरिएको थियो। विदेशी खेलाडीहरूलाई १४ देशका ८० खेलाडीलाई पनि तीनै क्याटगोरीमा राखिएको थियो। त्यसमध्ये पहिलो सिजनका १० खेलाडीलाई रिटेन गरिएको थियो। प्रत्येक टिमलाई अधिकतम दुई खेलाडी रिटेन गर्ने सुविधा दिइएको थियो। बाँकी ७४ खेलाडी ड्राफ्ट मार्फत् छनोट गरिएका हुन्।
जेठ २२ गतेदेखि सुरु हुने एनकेएल सिजन २ मा विराटनगर बाहुबली (कोशी प्रदेश), डिफेन्डिङ च्याम्पियन जनकपुर नाइट्स (मधेश प्रदेश), काठमाडौं माभरिक्स (बाग्मती प्रदेश), पोखरा लेकर्स (गण्डकी प्रदेश), बुटवल बुल्स (लुम्बिनी प्रदेश) र धनगढी वाइल्डक्याट्स (सुदूरपश्चिम प्रदेश) ले प्रतिस्पर्धा गर्नेछन्। सबै टिमले ९ स्वदेशी र ५ विदेशी खेलाडी ड्राफ्ट मार्फत् लिएर टिम तयार पारेका छन्।
कार्यक्रममा एनकेएल आयोजक एस्ट्रोनिक्स म्यानेजमेन्टका प्रमुख अमितकुमार बेगानी, अखिल नेपाल कबड्डी संघका अध्यक्ष तुलसी थापा, राष्ट्रिय खेलकुद परिषदका सदस्यसचिव रामचरित्र मेहता, नेपाल स्कुल स्पोर्ट्स फेडेरेसनका महासचिव राजकुमार कार्की, ओलम्पियन संघका अध्यक्ष दीपक विष्ट लगायतको उपस्थिति थियो। एस्ट्रोनिक्स म्यानेजमेन्टले एनकेएल सिजन २ को ब्रॉडकास्ट पार्टनरको रूपमा कान्तिपुर म्याक्स टीभी एचडीलाई समावेश गरेको छ।
