सरकारले काठमाडौंका सुकुम्वासी बस्ती भत्काएर २१९ परिवारलाई दशरथ रंगशालाको होल्डिङ सेन्टरमा सारिएको छ। बस्ती भत्किँदा धेरैले औषधि छुटेको, खानेकुरा नपाएको र स्वास्थ्य समस्या देखिएको स्वास्थ्यकर्मीहरूले बताएका छन्। स्वास्थ्य परीक्षणमा ४७ जनामा कमजोरी, रगतको दबाब समस्या देखिएको र एक वृद्ध मिर्गौला बिरामीलाई वीर अस्पतालमा रेफर गरिएको छ। १३ वैशाख, काठमाडौं।
त्रिपुरेश्वरस्थित दशरथ रंगशालाको होल्डिङ सेन्टरमा ६० वर्षीया सम्झना राई काँपिरहेकी छन्। भिडको बीच भुईंमा टुसुक्क बसेकी सम्झनाको अनुहार फिक्का देखिन्छ। आँखा रसाएका छन्। उनी उच्च रक्तचापको पुरानो बिरामी हुन् र नियमित औषधि खानुपर्छ। ‘शरीर थरथर काँपिरहेको छ। औषधि खान पाएको छैन। पेट भोकै छ। हिजो रातभर सुत्न सकिनँ,’ उनले आँसु पुछ्दै परीक्षण गरिरहेका स्वास्थ्यकर्मीसँग भनिन्।
सम्झनाको आवाज मधुरो छ। केही समय बोल्दा पनि थाक्छिन्। ‘अब केही बाँकी रहेन,’ आँसु पुछ्दै उनले भनिन्। उनी १४ वर्षदेखि मनोहरा किनारको टहरामा बस्दै आएकी थिइन्। आइतबार बिहान सरकारले डोजर लगायो र टहरा क्षणभरमै भत्कियो। ‘हामीलाई सामान सार्ने समयसमेत दिएनन्,’ उनले बताइन्। हतारमा सामान निकाल्दा धेरै सामान हरायो। ‘औषधि कहाँ परेको थाहा छैन। फेर्ने लुगा पनि छैन,’ उनी भावुक सुनिइन्।
गोपाल सुनार, ४६ वर्षका, जसको अनुहारमा चिन्ता र थकान छ, स्वास्थ्यकर्मीले उनको रक्तचाप मापन गर्दा मेसिनमा १६०/१०० अंक देखियो। ‘रक्तचाप धेरै उच्च छ,’ स्वास्थ्यकर्मी इन्दिरा पोखरेलले भनिन्। गोपालले भने, ‘म त औषधि नखाने बिरामी हुँ। धेरै तनाव भयो, शायद त्यसैले बढेको होला।’ सरकारले बनाएको जडिबुटीमा सानो टहरा भत्काएपछि उनलाई धेरै तनाव परेको उनले बताए। ‘अब छोराछोरीको भविष्य उज्यालो छैन,’ गोपालले निराश हुँदै भने।
