शिभाली गुरुङ र स्वस्तिका विष्ट १२औं सिटिजन्स बैंक खुला टेनिस प्रतियोगिताको महिला सिंगल्स फाइनलमा प्रवेश गरेका छन्। त्रिपुरेश्वरस्थित राष्ट्रिय खेलकुद परिषद्को कोर्टमा बिहीबार भएको सेमिफाइनलमा शिभालीले प्राज्ञा मानन्धरलाई ६–० र ६–१ तथा स्वस्तिकाले प्रकृति श्रेष्ठलाई ६–२ र ६–१ को सोझो सेटमा पराजित गरिन्।
पुरुष सिंगल्समा प्रदीप खड्का र दर्शिल श्रेष्ठले उपाधि भिडन्त सुनिश्चित गरेका छन्। सेमिफाइनलमा प्रदीपले आयुशमान हजुर घलेलाई ६–३, ६–७ र ६–१ तथा दर्शिलले प्रणव मानन्धरलाई ६–० र ६–० को सेटमा पराजित गरे। प्रतियोगितामा १३ स्पर्धा समावेश छन् र शुक्रबार ११ स्पर्धाको फाइनल हुने छ।
सिटिजन्स बैंकको मुख्य प्रायोजनमा आयोजित प्रतियोगितामा भेष्ट्रान ३५ वर्षमाथि पुरुष सिंगल्समा पूर्व राष्ट्रिय च्याम्पियन जितेन्द्र परियारले भीष्मजंग गुरुङलाई ६–४ र ६–१ तथा सन्तोष खत्रीले दावा सोनाम शेर्पालाई ६–२ र ७–५ को नतिजाले पछि पारेर फाइनलमा प्रवेश गरे। भद्रकालीस्थित आर्मी अफिसर्स क्लबमा भएका भेष्ट्रान ७० वर्षमाथि पुरुष सिंगल्सको उपाधि धीरबहादुर गुरुङले जिते।
प्रतियोगितामा विभिन्न उमेर समूहका खेलाडीहरूले प्रतिस्पर्धा गरिरहेका छन्। शनिबार पुरुष तथा महिला सिंगल्सको फाइनल हुनेछ।
सम्बन्धित खबर
