काभ्रे जिल्लाको रोशी खोलामा फसेका ६०/६५ जना यात्रुहरूलाई सशस्त्र प्रहरी बलले डोरी र जेसीबीको माध्यमबाट उद्धार गरेको छ। पानीको सतह बढ्दै गएपछि सडक कटान भएका कारण बीपी राजमार्ग अवरुद्ध भएको छ। सशस्त्र प्रहरीले जोखिमलाई ध्यानमा राख्दै काठमाडौंतर्फ आउँदै गरेका १६० वटा सवारी साधनहरूलाई रोकिएको छ। २१ वैशाख, काठमाडौं।
बीपी राजमार्ग अन्तर्गत काभ्रेको रोशी खोलामा फसेको ईभी माइक्रोबसका यात्रुलाई उद्धार गरिएको छ। सशस्त्र प्रहरी बलका सहप्रवक्ता तथा डीएसपी शैलेन्द्र थापाका अनुसार, ईभी हायसमा फसेका ६०/६५ जना यात्रुहरूलाई डोरी र जेसीबीको सहायताले उद्धार गरिएको छ। नमोबुद्ध नगरपालिका–६ चौकीडाँडा र रोशी गाउँपालिका–७ क्षेत्रभित्र पर्ने चार सय बढी क्षेत्र रहेको रोशी खोलामा पानीको सतह वृद्धि भएसँगै सडक कटान गरी बाटो पूर्णरूपमा अवरुद्ध भएको थियो।
१५ नम्बर गण काभ्रे र मनसुन प्रतिकार्य बेस भकुण्डेबाट सशस्त्र प्रहरीको टोली तत्काल उद्धार कार्यका लागि खटिएको डीएसपी थापाले जानकारी दिए। उनका अनुसार, बीपी राजमार्ग सडक खण्डमा आवतजावत गर्ने सवारी साधनहरूको सम्भावित जोखिमलाई ध्यानमा राख्दै, रोशी गाउँपालिका–७ लासटोलबाट काठमाडौंतर्फ आउँदै गरेका १६० वटा सवारी साधनहरू रोकी राखिएको छ।
