२२ वैशाख, काभ्रेपलाञ्चोक। बाढीले निम्त्याउनसक्ने संभावित जोखिमलाई ध्यानमा राख्दै नेपाल प्रहरी र ट्राफिक प्रहरीले सुरक्षित स्थानमा रोक्न चेतावनी दिएपनि लापरबाहीपूर्ण तरिकाले माइक्रोबस चलाएका पाँच जना चालकलाई नियन्त्रणमा लिएको छ। यात्रुहरूको जीवन र सम्पत्तिमा खतरा पुर्याएको आरोपमा पक्राउ परेका यी चालकलाई जिल्ला प्रहरी कार्यालय काभ्रेपलाञ्चोकको हिरासतमा राखेर अनुसन्धान जारी छ भनी एसपी कोमल शाहले जानकारी दिनुभयो।
सोमबार साँझदेखि अविरल वर्षाका कारण रोशी खोलाको बहाव तीव्र बढेपछि रोशी खोलाको बीच भागमा अड्किएका पाँचवटा माइक्रोबसका ८९ जना यात्रुहरूलाई नेपाल प्रहरी, सशस्त्र प्रहरी र नेपाली सेनाको संयुक्त प्रयासले राति १:०० बजे उद्धार गरी गन्तव्यसम्म पुर्याइएको थियो। यसैबीच, बिपी राजमार्ग हुँदै यात्रा गर्ने सबैलाई सदैव सूचना वा पूर्वजानकारी लिएर र प्रहरीको सुझाव पालन गरी यात्रा गर्न काभ्रेपलाञ्चोक जिल्ला प्रहरी कार्यालयले आग्रह गरेको छ।
