तनहुँको म्याग्दे गाउँपालिकामा कृषि तथा जलवायु सूचना केन्द्र स्थापना गर्ने सहमतिपत्रमा हस्ताक्षर भएको छ। यस सूचना केन्द्रले मौसम पूर्वानुमान, कृषि सल्लाह र जलवायु जोखिम न्यूनीकरणका जानकारी प्रदान गर्नेछ। गाउँपालिकाले पूर्वाधार र जनशक्ति व्यवस्थापन गर्नेछ भने चिल्ड्रेन–नेपालले दुई लाख रुपैयाँ सहयोग गर्नेछ। २२ वैशाख, दमौली (तनहुँ)।
स्थानीय समुदाय, विशेष गरी किसानहरूलाई समयमा मौसम र जलवायुसँग सम्बन्धित सूचना उपलब्ध गराई जलवायु परिवर्तन न्यूनीकरण, अनुकूलन र सामना रणनीति अंगीकार गर्न सहयोग पुर्याउने उद्देश्यले गाउँपालिकामा यस सूचना केन्द्र स्थापना गर्न लागिएको हो। यस कार्यका लागि म्याग्दे गाउँपालिका र श्रमिक बालबालिकाको सामाजिक एकीकरण मञ्च (चिल्ड्रेन–नेपाल) बीच सहमतिपत्रमा हस्ताक्षर गरिएको छ। गाउँपालिकाका अध्यक्ष श्रीप्रसाद श्रेष्ठ र चिल्ड्रेन–नेपालका कार्यकारी निर्देशक डिल्लीप्रसाद शर्मा हस्ताक्षरकर्ताहरू हुन्।
सुनिश्चित गरिएको केन्द्रमार्फत नागरिकलाई मौसम पूर्वानुमान, वर्षा, खडेरी, हुरीबाटास, असिना लगायतका मौसमी घटनाबारे जानकारी प्रदान गरिनेछ। साथै कृषि सल्लाह, चेतनामूलक सूचना र जलवायु जोखिम न्यूनीकरणसम्बन्धी जानकारी नियमित रूपमा प्रसारण गरिने गाउँपालिकाका प्रमुख प्रशासकीय अधिकृत नारायणप्रसाद अधिकारीले जानकारी दिए। स्रोतले किसानहरूलाई जलवायु अनुकूल कृषि प्रविधि जस्तै थोपा सिंचाई, ग्रिनहाउस, टनेल खेती, मल्चिङ लगायतका विषयमा जानकारी प्रदान गरिनेछ। यसले कृषि उत्पादन, खाद्यान्न आत्मनिर्भरता र जीवनस्तरमा सुधार ल्याउने विश्वास गरिएको छ।
गाउँपालिकाले केन्द्र सञ्चालनका लागि आवश्यक पूर्वाधार, जनशक्ति र सूचना व्यवस्थापनको जिम्मेवारी लिनेछ भने चिल्ड्रेन–नेपालले ‘जलवायु उत्थानशील समुदाय परियोजना’ अन्तर्गत दुई लाख रुपैयाँ सहयोग गर्नेछ। साथै प्राविधिक सहयोग, चेतनामूलक सामग्री तयारी र प्रचारप्रसारमा पनि सहयोग गरिने उल्लेख छ। जल तथा मौसम विज्ञान विभाग, कृषि तथा पशुपन्छी विकास मन्त्रालय, कृषि विभाग र गाउँपालिकाका कृषि र वातावरण शाखाबाट प्राप्त सूचना केन्द्रमार्फत स्थानिय कृषकसम्म पुऱ्याइनेछ। सूचनाहरू डिजिटल बोर्ड, मोबाइल मेसेज, फेसबुक र ह्वाट्सएप समूहबाट प्रसारण गरिने व्यवस्था मिलाइनेछ। उक्त केन्द्र एक महिनाभित्र सञ्चालनमा आउने छ। जलवायु सूचना केन्द्र सञ्चालनका लागि आवश्यक कोठा व्यवस्था गर्दै पालिकाले नियमित रूपमा सूचना अद्यावधिक गर्न कर्मचारी व्यवस्थापन गर्ने भएको छ।
