विराटनगरस्थित पूर्वाञ्चल विश्वविद्यालयको स्कुल अफ म्यानेजमेन्ट (पुसोम) मा अमेरिकन कर्नर मे ७ गते नयाँ स्थानबाट पुनः सञ्चालनमा आएको छ। यस नयाँ अमेरिकन कर्नरले अंग्रेजी भाषा सिकाइ, डिजिटल उपकरणहरूको निःशुल्क पहुँच, व्यवसाय सम्बन्धी तालिमहरू र एजुकेसन यूएसए सेवा प्रदान गर्नेछ। पुसोमका विद्यार्थी स्वयंसेवकहरूलाई ‘स्टुडेन्ट एसोसिएट्स’ का रूपमा गठन गरी कार्यक्रम सञ्चालन र जनचेतना विस्तारमा सक्रिय भूमिका दिने योजना बनाइएको छ।
अमेरिकन कर्नर आफ्नो नयाँ स्थानबाट औपचारिक रुपमा पुनः सञ्चालनमा आएको हो। पूर्वाञ्चल विश्वविद्यालय स्कुल अफ म्यानेजमेन्ट मोरङमा स्थानान्तरण भएपछि मे ७ मा यसको पुनः सुरुवात गरिएको छ। यसले कोशी प्रदेशका युवाहरूका लागि सिकाइ, सहभागिता र अवसरको एक प्रमुख केन्द्रको रूपमा अमेरिकन कर्नरलाई अझ सशक्त बनाएको छ।
नयाँ स्थानमा सञ्चालनमा आउँदा अमेरिकी दूतावासको अमेरिकन स्पेसेस नेटवर्कले गुणस्तरीय शिक्षा, नवप्रवर्तन र विश्वव्यापी अवसरहरूको पहुँच विस्तार गर्ने प्रतिबद्धता निरन्तरता दिएको जनाइएको छ। कार्यक्रममा विद्यार्थी, शिक्षक, सञ्चारकर्मी तथा विभिन्न समुदायका सरोकारवालाहरू सहभागी थिए।
अब पुसोम भित्र सञ्चालन हुने अमेरिकन कर्नरले विद्यार्थी, शिक्षक र युवा पेशाकर्मीहरूलाई अझ प्रभावकारी सेवा प्रदान गर्ने अपेक्षा गरिएको छ। यहाँ अंग्रेजी भाषा सिकाइ, डिजिटल उपकरणको निःशुल्क पहुँच, व्यवसायसम्बन्धी तालिम तथा कार्यक्रमहरू, शैक्षिक सामग्री र एजुकेसन यूएसए सेवा उपलब्ध गराइनेछ। आगामी दिनहरूमा युवा नेतृत्व विकास, उद्यमशीलता, नवप्रवर्तन, डिजिटल सीप तालिम र नागरिक सहभागितासम्बन्धी कार्यक्रमहरू सञ्चालन गरिने जनाइएको छ।
