चर्को मूल्यवृद्धि र निर्माण सामग्री अभावका कारण नागढुंगा-मुग्लिन सडक विस्तारको काम रोकिएको छ। पूर्वी खण्डको पहिलो भागमा ८५ प्रतिशत काम सम्पन्न भइसकेको छ भने दोस्रो भागमा ५७.१ प्रतिशत प्रगति छ। पश्चिमी खण्डमा ४३.९६ प्रतिशत काम भएको छ र विद्युत् पोल सार्ने काम बाँकी रहेको छ। २७ वैशाख, चितवन। राजधानी काठमाडौंको मुख्य ‘लाइफलाइन’ मानिने नागढुंगा-मुग्लिन सडक विस्तारको काम रोकिएको छ। निर्माण कम्पनीले चर्को मूल्यवृद्धि र निर्माण सामग्री अभाव रहेको भन्दै काम रोकिएको जनाएको छ। तीन खण्डमा विस्तार गर्ने यो सडकका लागि काम रोकिएपछि बर्खामा झनै प्रभाव पर्ने अनुमान गरिएको छ।
नागढुंगादेखि मुग्लिनसम्मको ९५ किलोमिटर लामो सडकलाई पूर्वी र पश्चिमी खण्डमा विभाजन गरी २०७९ मध्यदेखि सडक विस्तारको काम सुरु गरिएको थियो। नागढुंगादेखि मुग्लिनसम्मको सडकमा ठूलो बजार क्षेत्रहरूमा ६ लेन, सानो बजार क्षेत्रमा ४ लेन र अन्य ठाउँमा ३ लेन सडक बनाउने योजना रहेको छ। कठिन भूगोल र पहिरोको उच्च जोखिम भएका ठाँउहरूमा विशेष गरी डेडिकेटेड २ लेन सडक विस्तार गरिने छ। नौबिसेदेखि नागढुंगासम्म मालवाहक सवारीका लागि अलग्गै ‘क्लाइम्बिङ’ लेन बनाइने छ।
नागढुंगादेखि नौबिसेसम्म ४.७ किलोमिटर र नौबिसेदेखि मलेखुसम्म १७.५ किलोमिटर अलग क्लाइम्बिङ लेन निर्माण गरिने छ। तीन लेन भएका ठाउँमा एक लेन क्लाइम्बिङ लेन हुनेछ। क्लाइम्बिङ लेनमा अलग मार्किङ गरिने छ र केवल मालवाहक सवारीसाधनहरूलाई मात्र त्यस बाटोबाट गुड्न अनुमति दिइने छ। यस खण्डमा बनाइने २१ वटा नयाँ पुल सबै चार लेनका हुनेछ। दैनिक १२ हजार सवारीसाधनले ओहोरदोहोर गर्ने यो सडक विश्व बैंकको सहुलियतपूर्ण ऋणमा विस्तार गर्ने योजना रहेको छ। सडक विस्तार पछि राजधानी काठमाडौंसहित आसपास क्षेत्रमा आवतजावत सहज हुने विश्वास गरिएको छ।
सम्बन्धित खबर
