२ जेठ, वीरगञ्ज । चालु आर्थिक वर्षका १० महिनामा वीरगञ्ज भन्सार कार्यालयले करिब दुई खर्ब रुपैयाँको राजस्व सङ्कलन गरेको छ। चालु आवको साउन महिनादेखि वैशाख अन्तिमसम्म एक खर्ब ९९ अर्ब ४० करोड रुपैयाँ राजस्व सङ्कलन भएको जानकारी प्राप्त भएको छ। भन्सार विभागले यस अवधिमा वीरगञ्ज भन्सार कार्यालयलाई दुई खर्ब २३ अर्ब १८ करोड रुपैयाँको राजस्व सङ्कलन लक्ष्य दिएको थियो, जसमा ८९ दशमलव ३५ प्रतिशत मात्र पूरा भएको छ। भन्सार कार्यालयका सूचना अधिकारी उदयसिंह विष्टले चालु आर्थिक वर्षमा राजस्व सङ्कलन सन्तोषजनक रहेको बताएका छन्।
उनका अनुसार, वीरगञ्ज भन्सार कार्यालयको राजस्वको मुख्य स्रोत पेट्रोलियम पदार्थको आयात, सवारीसाधन र तिनका पार्टपुर्जाको आयात हुन्। विभागले कार्यालयलाई वार्षिक दुई खर्ब ७३ अर्ब ३९ करोड रुपैयाँ राजस्व सङ्कलन गर्ने लक्ष्य तोकेको छ। चालु वर्षका अझै दुई महिना बाँकी रहेकाले थप राजस्व सङ्कलन हुने अपेक्षा कार्यालयले लिएको छ।
तथ्याङ्कअनुसार कार्यालयले चालु आवको साउनमा १८ अर्ब ४४ करोड, भदौमा २० अर्ब ७३ करोड, असोजमा १९ अर्ब ९ करोड, कात्तिकमा १७ अर्ब ३३ करोड, मङ्सिरमा २० अर्ब ८० करोड रुपैयाँ राजस्व सङ्कलन गरेको थियो। त्यस्तै पुसमा २० अर्ब २० करोड, माघमा १८ अर्ब ९२ करोड, फागुनमा १९ अर्ब ३४ करोड, चैतमा २२ अर्ब ८२ करोड र वैशाखमा २१ अर्ब ७४ करोड रुपैयाँ राजस्व सङ्कलन गरिएको सूचना अधिकारी विष्टले उल्लेख गरेका छन्। –रासस
