सगरमाथा आरोही पेम्बा शेर्पाले २०८२ वैशाख ३० गते पहिलो पटक सगरमाथा चुचुरोमा मेस्सीको तस्वीर पुर्याएका छन्। शेर्पाले मेस्सीलाई भेटेर सगरमाथामा पुर्याएको ब्यानर उपहार दिन चाहेको जानकारी दिए। ३ जेठ, काठमाडौं। सगरमाथा आरोही पेम्बा शेर्पाले विश्वका चर्चित फुटबलर मेस्सीको तस्वीर सगरमाथाको शिखरमा पुर्याएका छन्। मिर्गौला प्रत्यारोपण गराएका ३८ वर्षीय शेर्पा २०८२ वैशाख ३० गते सगरमाथा चढ्न सफल भएका थिए। उनी मिर्गौला प्रत्यारोपणपछि सगरमाथा आरोण गर्ने पहिलो व्यक्ति समेत रहेका छन्। सोही समय उनले विश्वका सर्वोत्कृष्ट फुटबल खेलाडी मेस्सीको तस्वीर विश्वको सर्वोच्च शिखरमा पुर्याएका थिए।
विश्वकप २०२६ नजिकै आइरहेको र मेस्सी पनि सो प्रतियोगिता खेल्ने तयारीमा रहेका बेला तस्वीर सार्वजनिक गरिएको शेर्पाले बताए। सगरमाथामा मेस्सीको तस्बिर पुर्याउने आफू पहिलो व्यक्ति भएको दावी उनका छ। उनका अनुसार, मेस्सीको जादुमयी खेल र शालीन व्यक्तित्वले किशोर अवस्थादेखि नै आफ्नो ध्यान तानेको छ। उपाधिनजिकै पुगेर कयौं पटक हार खाँदा पनि धैर्य गरी अघि बढ्ने मेस्सीको साहसबाट आफूले जीवनमा धेरै प्रेरणा लिएको शेर्पा बताउँछन्।
‘दुवै मिर्गौला फेल भएर डायलासिसको भरमा बाँचिरहँदा मैले पनि पटक–पटक जीवनदेखि हरेश खाएँ’ शेर्पा भन्छन्, ‘तर मिर्गौला प्रत्यारोपणपछि दोस्रो जीवन पाएँ र स्वस्थ भएर सगरमाथा चुचुरोसम्म पुग्न सफल भएँ।’ २०२२ को कतार विश्वकपमा मेस्सीको कप्तानीमा रहेको अर्जेन्टिनाले उपाधि जित्दा शेर्पाले मिर्गौला प्रत्यारोपण गराएको करिब २ महिना भएको थियो। मेस्सी खुसीले हाँसेको र रोएको दृश्य उनले टिभीमार्फत हेर। कयौं असफलतापछि हात लागेको मेस्सीको जीवनकै सबैभन्दा ठूलो सफलता थियो त्यो।
‘मैले सोचें– वर्षौंसम्म धैर्यता गरेर मेस्सीले विश्वकप जित्न सक्छन् भने, मैले किन हिमाल चढ्न नसक्ने?’ शेर्पा भन्छन्, ‘त्यो हौसलासहित शरीरमा बुबाले दिएको मिर्गौला र हातमा मेस्सीको फोटो भएको ब्यानर बोकेर सगरमाथाको चुचुरोमा पुगें।’ मेस्सीले विश्वकप ट्रफी चुम्दै गरेको तस्वीर उनले सगरमाथाको शिखरमा पुर्याएका थिए। मेस्सीलाई भेटेर सगरमाथामा पुर्याएको उक्त ब्यानर उपहार दिने इच्छा रहेको शेर्पाले सुनाए। ‘मेरो एउटा चाहना छ, मेसीलाई प्रत्यक्ष भेटेर, आउँदो जन्मदिनको अवसरमा यो ऐतिहासिक ब्यानर उपहार स्वरूप हातमा सुम्पिने सोचमा छु’ शेर्पाले भने। सोलुखुम्बुको दूधकोशी गाउँपालिका स्थायी घर भएका शेर्पाको २०७६ सालमा दुवै मिर्गौला फेल भएको पत्ता लागेको थियो। २०७९ कार्तिक २ गते भक्तपुरस्थित शहीद धर्मभक्त प्रत्यारोपण केन्द्रमा उनको मिर्गौला प्रत्यारोपण गरिएको थियो। त्यसको साढे २ वर्षपछि उनी सगरमाथा आरोहण गर्न सफल भए।
