बराकाह पावर प्लान्टमा आइतबार ड्रोन आक्रमण भएको छ, जसले प्लान्टमा आगो लागेको छ। यूएईले आक्रमणको कडा निन्दा गर्दै शत्रु पक्षलाई सैन्य वा कूटनीतिक जवाफ दिने अधिकार सुरक्षित रहेको जनाएको छ। बराकाह पावर प्लान्टले यूएईको कुल बिजुली मागको करिब २५ प्रतिशत उत्पादन गर्छ र वार्षिक २.२४ करोड टन कार्बन उत्सर्जन रोक्छ।
यूएईको विदेश मन्त्रालयका अनुसार दफरा क्षेत्रमा रहेको बराकाह परमाणु ऊर्जा केन्द्रमा पश्चिमी सीमाबाट ड्रोन आक्रमण भएको थियो। हालसम्म यो आक्रमण कसले गरेको हो भन्ने खुलाइएको छैन। मन्त्रालयले देशको सुरक्षामाथि प्रत्यक्ष खतरा र अन्तर्राष्ट्रिय कानुनको उल्लंघन भन्दै आक्रमणको कडा निन्दा गरेको छ। यस घटनामा कुनै पनि व्यक्ति घाइते नभएको र विकिरण सुरक्षा स्तरमा पनि कुनै असर नपरेको जनाइएको छ।
हालै इरान र यूएईबीच तनाव बढेको बेला यो आक्रमण भएको हो। यूएईले इरानले अमेरिका र इजरायलसँगको युद्धका क्रममा ३ हजार भन्दा बढी आक्रमण गरेको जनाएको छ। भारत र साउदी अरबले पनि यस आक्रमणको निन्दा गरेका छन्। साउदी अरबले यसलाई ‘उत्तेजनाबिनाको आतंकवादी कार्य’ भन्दै आलोचना गरेको छ।
बराकाह पावर प्लान्ट यूएईको उत्तरपश्चिमी मरुभूमिमा, साउदी अरब र कतारको सीमासँग नजिक रहेको अल दफरा क्षेत्रमा पर्दछ। यो पावर प्लान्ट अमिरात्स न्यूक्लियर इनर्जी कर्पोरेसनको समूहले दक्षिण कोरियाली ऊर्जा कम्पनीसँग मिलेर निर्माण गरेको हो। यसले वार्षिक ४० टेरावाट–घण्टा बिजुली उत्पादन गर्छ, जुन यूएईको कुल बिजुली मागको करिब २५ प्रतिशत हो।
सम्बन्धित खबर
