कोरी बस्टार्ड संसारकै सबै भन्दा भारी भए पनि उड्न सक्षम चरा हो, यसको तौल १८ देखि २० केजीसम्म पुग्न सक्छ। कोरी बस्टार्ड जमिनमै बासस्थान गर्छ र आवश्यक परेमा शक्तिशाली दौड र झटका हान्न सक्छ। मानव क्रियाकलापका कारण कोरी बस्टार्डको प्राकृतिक बासस्थान घट्दै गएको छ र यो संकटमा परेको छ। अफ्रिकाको विशाल सवाना क्षेत्र अनेकौं अनौठा र शक्तिशाली जनावरहरूको घर हो। सिंह, चितुवा, हात्ती र गैँडाजस्ता जनावरहरू सदैव मानिसहरूको ध्यानको केन्द्रमा रहन्छन्। तर त्यहाँकै विशाल मैदानमा एउटा यस्तो चरा पनि बाँचिरहेको छ, जसले आफ्नो असाधारण विशेषताका बाबजुद धेरै कम चर्चा पाएको छ। त्यो चरा हो—कोरी बस्टार्ड।
कोरी बस्टार्ड संसारकै सबैभन्दा वजनदार भए पनि उडान भर्ने चरामध्ये एक हो। विशाल शरीर, शक्तिशाली खुट्टा, फराकिला पखेटा र आकर्षक प्रजनन प्रदर्शनले यसलाई प्रकृतिको अद्भुत सिर्जनामध्ये एक मानिन्छ। हेर्दा शान्त र सुस्त देखिने यो चराले आवश्यक पर्दा शक्तिशाली दौड लगाउन सक्छ। खतरनाक झटका हान्न सक्छ र आकाशमा उडेर आफूलाई बचाउन सक्षम छ। यसको जीवनशैली, व्यवहार र संघर्षले वैज्ञानिकहरूलाई समेत आकर्षित गरेको छ।
कोरी बस्टार्डको जीवनशैली अन्य चराभन्दा निकै फरक हुन्छ। अधिकांश चराहरू रुखमा बस्ने वा लामो समय आकाशमा उड्ने गर्छन्, तर कोरी बस्टार्ड जमिनमै बस्न रुचाउँछ। यो खुला घाँसे मैदान, सुक्खा सवाना र झाडी भएको क्षेत्रमा पाइन्छ। यसले जमिनमा हिँड्दै खाना खोज्ने गर्छ। यसको चाल सामान्यतया धेरै ढिलो हुन्छ। आरामसँग मैदानमा हिँड्दै आफ्नो वरिपरि सतर्क दृष्टि राख्छ। तर खतरा महसुस भयो भने अचानक छिटो दौडन सक्छ। यसका खुट्टा अत्यन्त बलियो हुन्छन्। आवश्यक परे यसले तगडा झटका हान्न सक्छ, जसले शिकारीलाई समेत चोट पुर्याउन सक्छ।
कोरी बस्टार्ड प्रायः सानो समूहमा बस्ने गर्छ। एउटा समूहमा ५–६ वटा चरा हुन सक्छन्। कहिलेकाहीँ ३०–४० सम्मको ठूलो समूह पनि देख्न सकिन्छ। यसरी समूहमा बस्दा खतरा चाँडै थाहा पाउन सजिलो हुन्छ र शिकारीबाट बच्ने सम्भावना बढ्छ।
