समाचार सारांश नेपाली कांग्रेस सुदूरपश्चिम प्रदेशका सभापति वीरबहादुर बलायरले पार्टीलाई एकताबद्ध गर्ने जिम्मेवारी सभापति गगनकुमार थापाको भएको बताएका छन्। बलायरले भने, ‘नेतृत्व तहबाट पार्टी फुटाउन खोजिएको हो भने यसको कुनै औषधि छैन र जोगाउन सकिँदैन।’ १० जेठमा धनगढीमा प्रदेश समितिको आयोजनामा हुने भेलालाई गुटको भेलाका रूपमा नलिन बलायरले आग्रह गरेका छन्। ६ जेठ, धनगढी। नेपाली कांग्रेस सुदूरपश्चिम प्रदेशका सभापति वीरबहादुर बलायरले पार्टीलाई एकताबद्ध गरेर अगाडि बढाउने जिम्मेवारी नेतृत्वको रहेको बताएका छन्। पार्टीको व्यापक एकता र पुनर्जीवनका लागि १० जेठमा धनगढीमा प्रदेश समितिको आयोजनामा हुने भेलाबारे जानकारी दिन आयोजित पत्रकार सम्मेलनमा उनले अध्यक्ष गगनकुमार थापाको जिम्मेवारी रहेको बताए। तर यदि सभापति थापाको नियत नै पार्टी फुटाउने छ भने एकता जोगाउनु सम्भव छैन, बलायरले बताए।
‘‘हामी फुटको लागि जागरण भेला गरिरहेका छैनौँ। यदि नेतृत्व तहबाट पार्टी फुटाउन खोजिएको हो भने यसको कुनै औषधि छैन र जोगाउन पनि सकिँदैन,’’ उनले भने। ‘‘विशेष महाधिवेशनबाट चयन भएका सभापति गगनकुमार थापाको प्रहरीले सबै कुरा नियालिरहेका छन्। उहाँ सिंगो कांग्रेसको सभापति हुन चाहनुहुन्छ भने कुनै हालतमा कांग्रेस फुटको स्थितिमा पुग्ने छैन।’’ प्रतिनिधिसभा चुनावमा कांग्रेसलाई मत नदिएका मानिसहरूले पार्टी फुटको अफवाह फैलाइरहेको बताउँदै बलायरले १४औँ महाधिवेशनबाट निर्वाचित पदाधिकारी तथा नेताहरूप्रति अपमानजनक व्यवहार सहन नहुने बताए। ‘‘हिजोका पदाधिकारीलाई स्थापित गर्न भनेका छैनौँ, तर नेतृत्व गर्ने नेताहरूको मान सम्मान गरिनुपर्छ,’’ उनले भने। ‘‘१५औँ महाधिवेशनको व्यवस्थितताका लागि हाम्रो एकता आवश्यक छ।’’ निवर्तमान सभापति शेरबहादुर देउवाको समूहले काठमाडौंमा खोलेको सम्पर्क कार्यालयलाई फुटको रूपमा नलिनुपर्ने उनको तर्क छ। कांग्रेसलाई कसरी अघि बढाउने भन्ने विषयमा छलफल र विचार मन्थन गर्न १० जेठमा प्रदेशस्तरीय भेला आयोजना गरिएको उनले बताए। ‘‘सुदूरपश्चिम प्रदेशबाट आगामी दिनमा कांग्रेसलाई कसरी अगाडि बढाउने भन्ने विषयमा छलफल गर्न कार्यक्रम राखेका छौँ,’’ उनले भने। ‘‘नेतृत्वलाई केही समय दिनुपर्ने सुझाव र कसरी अघि बढ्ने भन्ने विषयमा पनि छलफल हुनेछ।’’ तर कार्यक्रमलाई कुनै गुटको भेलाका रूपमा नलिन उनी आग्रह गरे। विदेशमा रहेका निवर्तमान सभापति शेरबहादुर देउवाको चिन्ता पनि कांग्रेसलाई एकताबद्ध कसरी राख्ने भन्नेमा रहेको उनले बताए।
